Kiss á Gauknum?

Gaukur á Stöng heldur upp á afmæli um helgina. Fókus fagnar því að af því tilefni mætir "hljómsveitin" Kiss á svæðið og gerir allt vitlaust. Fyrir ekki svo mörgum árum kom þessi sama "hljómsveit" fram á Hard Rock Café í Kringlunni og þá létu hvorki meira né minna en 800 manns sjá sig á staðnum og margir þurftu frá að hverfa vegna fjölmennis. Það er því vissara að mæta tímanlega í kvöld því Gene Simmons, Ace Frehley og félagar eru ekki mikið fyrir að láta bíða eftir sér. Það er óhætt að lofa því að áhorfendur munu skemmta sér konunglega fram á rauða nótt því allir helstu slagararnir munu fá að hljóma. Að sjálfsögðu verða allir "meðlimirnir" í fullum skrúða, þ.e. málaðir og í spandexgöllum líkt og þegar þeir tróðu upp á Hard Rock um árið. Þetta er eitthvað sem fólk ætti alls ekki að missa af. Ef þú vilt vita meira um skemmtanalíf helgarinnar, t.d. skoða djammkortið eða lesa um bíófrumsýningarnar, lestu þá Fókus, sem fylgir DV í dag.