Mikið af LSD fannst í pósti

Maður um þrítugt var handtekinn í gær í tengslum við mikið magn af LSD sem fannst í póstsendingu frá Hollandi. Hörður Jóhannesson, yfirlögregluþjónn í Reykjavík, vill ekki gefa upp um hversu mikið magn hafi verið að ræða, en segir það hafa verið mjög mikið. Fíkniefnadeild lögreglunnar í Reykjavík í samvinnu við tollgæsluna fundu efnin fyrr í vikunni í póstsendingu sem kom frá Hollandi. Hörður segir að við rannsókn málsins hafi böndin borist til Vestmannaeyja. Samvinna hófst í framhaldinu við lögregluna í Vestmannaeyjum sem handtók manninn eftir hádegi í gær. Í framhaldinu var maðurinn sendur til Reykjavíkur þar sem hann var yfirheyrður fram á kvöld af fíkniefnadeildinni í Reykjavík. Í dag kemur í ljóst hvort farið verður fram á gæsluvarðhald yfir manninum en hann var í haldi lögreglunnar í nótt. Hörður segir bæði sjaldgæft og langt síðan að svo mikið magn af LSD hafi fundist. Um er að ræða pappír sem LSD sýran hefur verið látin síast í.