Stöðvaði leik vegna hrópa

Móðgaður dómari í Hollandi stöðvaði leik í úrvalsdeildinni eftir aðeins 10 mínútur, vegna ókvæðisorða sem áhorfendur ópuðu að honum. Dómarinn segir að áhorfendur hafi farið yfir mörkin með kynþáttahaturssöngvum og fleiru í þeim dúr og sér hafi einfaldlega verið nóg boðið. Heimamenn í ADO Hague, sem voru 2-0 undir gegn PSV Eindhoven þegar leikurinn var flautaður af, gætu verið í vandræðum, þar sem þetta er í annað sinn á tímabilinu sem þeir gera sig seka um að leggja hörundslitaðan dómara í einelti, þó að ekki hafi sá fyrri sem fyrir aðkasti varð flautað leikinn af. Hollenska knattspyrnusambandið hefur hafið herferð gegn kynþáttahatri á knattspyrnuvöllum og mega heimamenn því búast við þungum sektum eða jafnvel stigamissi vegna atviksins.