Sædýrasafn innan tveggja ára

Til stendur að opna stórt og veglegt sjávardýrasafn í Reykjavík innan tveggja ára. Fjölskyldu- og húsdýragarðurinn fær þess vegna nýja lóð og verður stækkaður um fjórðung.  Margir muna eftir gamla sædýrsasafninu sem staðsett var í Hafnarfirði. Nú fer loks að rísa nýtt slíkt safn, og er þegar búið að opna fyrsta áfangann í Fjölskyldu- og húsdýragarðinum í Reykjavík. Borgarstjóri gerði það með því að færa kolkrabba úr fötu yfir í búr sitt. Stefnan er að stækka sjávardýrasafnið hratt, og til þess þarf að stækka garðinn. Hjá borgarskipulagi er nú til umfjöllunar tillaga um að stækka garðinn um 24 þúsund fermetra, eða sem svarar rúmlega þremur Laugardalsvöllum. Þarna á að rísa nýtt sjávardýrasafn og vísindaveröld. Síðan er hér enn óskipulagt svæði. Nú má sjá í safninu stærstu fiskabúr landsins, sem taka allt upp í fimm þúsund lítra. Sjórinn kemur úr nýrri sjávarborholu við Sæbraut. Þar eru nú tegundir eins og ufsi og þorskur, ásamt flatfiskum, kuðungum, krossfiskum og kröbbum. Tegundunum verður fjölgað til muna þegar safnið stækkar, og ekki er útilokað að þar verði stór sjávarspendýr. Ef allt gengur upp er stefnan að opna nýja safnið innan tveggja ára.