Fullkomnasta vélmenni sögunnar?

Hann getur hlaupið, spjallað og heilsað, og hann er afburðagreindur. Eitt fullkomnasta vélmenni sem hefur verið framleitt er komið fram á sjónarsviðið. Markmið Honda er að búa til vélmenni sem getur leyst verkafólk af hólmi. Það hefur ekki tekist fullkomlega hingað til, en nýjasta tegundin er sú alfullkomnasta hingað til. Vélmennið, sem kallast Asimo, er 130 cm á hæð, og fyrir utan að geta gengið og haldið uppi einföldum samræðum, getur vélmennið hlaupið á þriggja km hraða á klukkustund. Asimo er greindari en fyrri útgáfur, hefur minni á við fimm heimilistölvur, og getur lagt lykkju á leið sína framhjá fólki og hlutum á leið sinni á áfangastað. Þá getur hann farið upp og niður stiga, þekkt raddir, og tekið í höndina á fólki. En hann er ekki til sölu, enda hefur Honda enn ekki náð markmiði sínu. Þó standa vonir til að Asimo geti séð um skrifstofupóstinn, og standa vonir til að bætt útgáfa af honum geti leyst verkafólk af að hluta, árið 2010.