Clinton á Þingvöllum

Bill Clinton, fyrrverandi forseti Bandaríkjanna, er nú á Þingvöllum, en hann lenti á Reykjavíkurflugvelli klukkan níu í morgun. Ingólfur Bjarni Sigfússon, fréttamaður Stöðvar 2 og Bylgjunnar, hefur fylgt honum frá komunni til landsins og segir ýmsar tilfæringar eiga sér stað á dagskránni. Clinton hafi bæði verið skráður í hádegisverð í Valhöll á Þingvöllum og á veitingastað í Reykjavík en hætt var við hvort tveggja. Því væri nú óvíst hvert förinni væri heitið næst. Seinna í dag mun forsetinn fyrrverandi hins vegar ræða við Davíð Oddsson forsætisráðherra, Ólaf Ragnar Grímsson, forseta Íslands, og að lokum Halldór Ásgrímsson utanríkisráðherra. Clinton virðist mjög rólegur yfir fjölmiðlafárinu og fólki sem vill faðma hann. Aðstoðarmenn og hjálparkokkar virðast hins vegar vilja halda honum í „gullfiskabúrinu“ og sveigja fjölmiðlafólki jafnharðan frá. Clinton fékk þó að ræða við fjölmiðla fyrir utan bandaríska sendiráðið á ellefta tímanum í morgun og sagðist vera ánægður með að vera kominn hingað til lands, þau hjónin væru afskaplega hrifin af landinu. Eiginkona hans, Hillary Clinton, er hér í opinberum erindagjörðum sem öldungardeildarþingmaður en hann er á leið til Írlands að kynna og árita ævisöguna sem hann er nýbúinn að gefa út. Hillary Clinton kom hingað til lands á meðan hún var forsetafrú og Bill Clinton segist hafa ákveðið að sækja hana á leiðinni til Írlands. Hann segist ætla að skoða sig um á landinu í dag og hitta forsætisráðherra, forseta Íslands og utanríkisráðherra. Hann heldur svo af landi brott í kvöld og fer þá til Dyflinnar. Þegar hann var spurður hvað hann ætli að ræða við íslenska ráðamenn sagðist Clinton ætla að láta þá ráða umræðuefninu. Líklega myndu þeir ræða fortíðina og þau verkefni sem þeir hefðu unnið að saman á meðan hann var forseti Bandaríkjanna. Kosturinn við að vera ekki lengur í embætti væri að geta leyft öðrum að ráða umræðuefninu. Aðspurður um kosningabaráttuna vegna forsetakosninganna í Bandaríkjunum sem margir hafa áhuga á, og sjónvarpsauglýsingar sem mikið hefur verið rætt um undanfarna daga þar sem ráðist er á herþjónustu Johns Kerrys í Víetnam og reynt að sverta mannorð hans, segir Clinton þetta bara það sem hægri öflin í Bandaríkjunum gera. Þegar John McCain hafi barist við George Bush um útnefningu Repúblikanaflokksins árið 2000 hafi sömu menn og kostuðu auglýsingarnar gegn Kerry kostað auglýsingar gegn honum. McCain hafi verið stríðsfangi í fimm og hálft ár en engu að síður hafi því verið haldið fram að hann væri föðurlandssvikari. Þetta hefðu að sjálfssögðu verið hreinar lygar. Clinton segir að sömu öfl hefðu reynt að halda því fram að hann, sem ekki fór til Víetnam vegna þess að hann var á móti stríðinu, hefði farið til Rússlands til að reyna að losna við bandaríska ríkisborgararéttinn. Þetta hefði allt verið lygi. Eina leiðin til að berjast gegn svona væri að svara ásökunum beint og benda á staðreyndir málsins. Nú væri mál að menn færu að ræða um hin raunverulegu kosningamál, framtíðina, ekki fortíðina. Fólk hefði áhuga á framtíðinni og stefnumálum frambjóðenda. Forsetinn fyrrverandi segist telja að nú fari frambjóðendur og stuðningsmenn þeirra í auknum mæli að snúa sér að umræðum um stefnumál. Hann á von á því að skoðanakannanir muni sýna aukið fylgi við Bush í tengslum við þing Repúblikana í New York en svo muni bilið minnka á ný. Clinton segist búast við að úrslit forsetakosningana muni ráðast í kappræðum milli frambjóðendanna og árekstrum milli þeirra Kerrys og Bush. Allt getur gerst sagði hann að lokum. Ítarlega verður fjallað um heimsókn Bill Clintons og viðræður hans við íslenska ráðamenn í fréttum Stöðvar tvö klukkan hálf sjö í kvöld. Hægt er að hlusta á fréttina, ásamt viðtali Ingólfs Bjarna Sigfússonar við Bill Clinton, með því að smella á hlekkinn hér að neðan.