Úrslitin skulu standa

Áfrýjunardómstóll KKÍ tók í gær fyrir áfrýjun í máli Fjölnis og Hauka í Intersportdeildinni þar sem biluð leikklukka er talin hafa ráðið úrslitum í leik liðanna í fyrstu umferð deildarinnar. Fjölnismenn unnu leikinn, 87-86, en Haukar kærðu úrslitin vegna bilunar í leikklukku á lokasekúndum leiksins. Dómstóll KKÍ ógilti úrslitin og ákvað að leikurinn skyldi fara fram á nýjan leik. Fjölnismenn áfrýjuðu og áfrýjunardómstóll KKÍ úrskurðaði í gær að úrslit leiksins skyldu standa þar ekki væri hægt fyrir dómstóla að breyta umdeildum ákvörðunum dómara. Þessi niðurstaða er endanleg og geta Haukar ekki áfrýjað henni.