Haukur M bestur Íslendinga á imdb

Fókus, sem fylgir DV í dag, fór í himnaríki kvikmyndanördsins, International Movie Data Base. Þar eru upplýsingar um nánast allar kvikmyndir sem gerðar hafa verið og þar að auki er birt einkunnargjöf; útkoman af því sem skráðir notendur vefsins hafa gefið myndum í einkunn. Flestallar íslensku myndirnar eru á vefnum og hér má sjá hvernig þær koma út, í röð frá bestu myndinni til þeirrar verstu. Haukur á toppnum Mismörg atkvæði liggja til grundvallar einkununum. Þannig eru ekki nema 9 atkvæði að baki dúx-einkun myndarinnar Fyrsti apríl eftir Hauk M. Mynd Hauks slær við myndum eins og Godfather, Citizen Kane og Casablanca og verður það að teljast nokkuð góður árangur hjá kvikmyndagerðarmanninum unga! Samkvæmt þessu hefur Hauki farið rosalega fram síðan hann gerði myndina (Ó)eðli, sem fær bara 5.4 í einkunn. Kannski er árangur Stuðmannamyndarinnar Með allt á hreinu ögn trúverðugri því 78 manns liggja til grundvallar 8.0 einkunnar myndarinnar. Í þriðja sæti er svo Sódóma Reykjavík og hafa 217 manns gefið myndinni einkunn. Vinsælasta íslenska myndin samkvæmt þessum lista er 101 Reykjavík með 1628 atkvæði á bakvið ágætis einkuninni 6.9. Þar næst kemur Nói albínói með 783 atkvæði (7.0) en Cold Fever (6.7) og Englar alheimsins (7.0) eru næstar, báðar með um 470 atkvæði. Hrafn á botninum Á botninum eru svo nokkrar myndir sem löngum hafa þótt lélegar og jafnvel verið hafðar í flimtingum manna á meðal. Myndin Blossi/810551 lauk leiklistarferli Páls Banine nokkur hratt og örugglega, Reykjavík Guesthouse þótti harla glötuð og Nei er ekkert svar verður lengi í minnum höfð vegna yfirþyrmandi lélegheita. Hver man t.d. ekki eftir atriðinu í bakaríinu? Versta íslenska myndin fyrr og síðar er svo Opinberun Hannesar eftir Hrafn Gunnlaugsson og er hún meðal verstu mynda sem gerðar hafa verið í heiminum. Myndin fær aðeins 2.7 í heildareinkunn, en 112 manns hafa gefið myndinni einkunn. Hrafn getur þó huggað sig við það að hann var einu sinni góður og Hrafninn flýgur er meðal efstu íslensku myndanna með 7.4. Opinberun Hannesar fékk mjög ríflega styrki á sínum tíma og það er svo sannarlega gott til þess að vita að skattfé almennings á Íslandi sé varið til svona þarfra verka. Allan listann, þar sem sjá má einkunn yfir sextíu íslenskra mynda, er að finna í Fókus, sem fylgir með DV í dag, auk alls um skemmtanalífið og margt, margt fleira.