Ísland í dag og fyrir 30 árum

Frönsk hjón og kvikmyndagerðarmenn, sem fjölluðu um Ísland á margmiðlunarsýningu árið 1971, hafa tekið upp þráðinn að nýju. Ætlunin er að bera saman Ísland í dag og Ísland fyrir 30 árum.  Hjónin, Christine og Patrick Le Sellier, eru við tökur á Austurlandi þessa dagana en mikið vatn hefur runnið til sjávar frá því þau voru hér fyrir rúmum þremur áratugum. Dóttir þeirra, Sólveig, er með í för í þetta skipti en öll börn þeirra hjóna bera íslensk fornöfn. Árið 1971 ræddu þau líka við ungan og upprennandi stjórnmálamann en sá maður ber allt annan titil í dag. Hjóni segjast hafa hitt Vigdísi Finnbogadóttur fyrir tilviljun það ár á sama tíma og þau tóku viðtal við Kristján Eldjárn. Þau hefðu svo beðið um viðtal við ungan stjórnmálamann, helst einhvern efnilegan með framtíð í stjórnarandstöðu, og var þá boðið að taka viðtal við Ólaf Ragnar Grímsson. Af fimm forsetum lýðveldisins hafi þau því hitt þrjá. Christine og Patrick munu svo aftur taka viðtal við Ólaf Ragnar á morgun. Þau segjast ætla að fara upp að Kárahnjúkastíflu því myndin sem þau eru að taka gangi út á hversu landið sé ríkt af sögu og hefðum. Þau líti hins vegar einnig til framtíðar hvað varðar vetnisframleiðslu, erfðagreininguna og þessa umdeildu stíflu. Patrick segir þau spyrja spurninga um vistvæna orku og orkulindir og það sé nokkurn veginn það sem myndin snúist um; Ísland, land minninga og land rannsókna.