Fyrirhugaðar framkvæmdir stöðvaðar

Byggingafulltrúi hefur fyrirskipað að ekki megi hefja framkvæmdir við nýtt hótel í Eimskipafélagshúsinu sem áttu að hefjast tíunda september þar sem ekkert byggingaleyfi er fyrir hendi.  Byggingafulltrúi skrifaði verkfræðistofunni VSÓ-ráðgjöf á dögunum að allar framkvæmdir væru óheimilar við húsið þar sem byggingaleyfi þyrfti fyrir framkvæmdinni. Einungis hefur verið sótt um að breyta notkun hússins en þar voru, sem kunnugt er, áður skrifstofur Eimskipafélagsins. Slíkt leyfi er ekki til staðar. Til að leyfi vegna breytingar á notkun hússins fáist þarf að fara fram grenndarkynning sem tekur í það minnsta sex vikur. Geri nágrannar alvarlegar athugasemdir gæti slíkt dregist miklu lengur. Þá er húsið friðað að utan og að hluta til að innan sem torveldar allar breytingar og krefst þess að Húsafriðunarnefnd komi að málinu. Samkvæmt heimildum fréttastofu er gert ráð fyrir sjö gluggum á eldvarnarvegg sem bæði er andstætt byggingareglum og kallar auk þess  á leyfi húsafriðunarnefndar þótt veggurinn sé ekki hluti af upprunalegri gerð hússins. Eimskipafélagið hefur sótt um leyfi til að taka friðaðar innréttingar út ur húsinu til geymslu annars staðar. Húsafriðunarnefnd hefur enn sem komið er ekki gefið samþykki sitt fyrir því en nefndin hóf að fjalla um málið í byrjun júlí. Magnús Skúlason, forstöðumaður Húsafriðunarnefndar, segir að það hafi orkað tvímælis að nefndin skyldi leyfa á sínum tíma að innréttingar Reykjavíkurapóteks yrðu teknar niður og geymdar í kössum. Hann sagði að álit nefndarinnar lægi þó ekki fyrir en leyfi hennar þarf til framkvæmdarinnar. Magnús sagði hart að ekki væri hægt að nota þessar innréttingar í viðhafnarsal hótelsins en eigendur telji það ógerlegt. Andri Már Ingólfsson hótelstjóri hefur sagt í viðtölum við fjölmiðla að þegar sé farið að bóka gesti á hótelið frá og með næsta vori.