Kom ekki í endurskoðun í vor

Eigandi vörubílsins sem gjöreyðilagðist þegar hann fór fram af einbreiðri brú yfir Laxá í Laxárdal fékk mánaðarfrest til að láta gera við hemlunarbúnað eftir aðalskoðun. Það var í apríl en þegar slysið varð hafði ekki enn verið komið með bílinn í endurskoðun.  Eigandi vörubílsins, Sigvaldi Arason, segir að ekkert sé til í því að bíllinn hafi verið bremsulaus þegar bílstjóri hans beygði honum út af einbreiðri brú til að forðast árekstur og steyptist tíu metra niður í stórgrýti. Hins vegar fengust þær upplýsingar hjá ökutækjaskrá að þó nokkrar athugasemdir hefðu verið gerðar við ástand bílsins þegar hann kom þangað í skoðun þann 19. apríl á þessu ári. Meðal annars var gerð athugasemd við hemlunargetu og stýrisenda. Eigandinn fékk frest til 19. maí til að koma með hann í endurskoðun. Hann hafði ekki gert það fyrir slysið. Sigvaldi Arason vildi ekkert tjá sig um málið þegar fréttastofa hafði samband við hann í dag en sagði bílinn hafa verið í toppstandi og hefði hann gögn því til staðfestingar. Þegar hann var spurður nánar um hvar eða hvenær hefði verið skipt um bremsurnar sagði hann að yfirlýsing yrði gefin um málið í næstu viku. Í frétt Fréttablaðsins segir að reynt hafi verið að fara með bílinn í skoðun fyrir stuttu en verið vísað frá vegna annríkis og sagt að koma eftir tvær vikur. Ökumaður vörubílsins, sem á ótrúlegan hátt slapp lítið meiddur úr slysinu, staðhæfir að bremsurnar hafi verið nýjar í bílnum og hafi hann sjálfur horft á þegar skipt var um þær. Lögreglan í Búðardal, sem hefur með rannsókn málsins að gera, segir að enginn grunur sé um að um annað en slys sé að ræða og sé gengið út frá því við rannsóknina. Vörubíllinn var fjarlægður strax eftir slysið og fluttur til Borgarness. Lögreglan býst við að rannsókn málsins ljúki fljótlega í næstu viku. Frumherji í Borgarnesi sér um rannsókn á bílnum. Hún var þó ekki hafin í dag og ekki fékkst uppgefið hve lengi sú rannsókn myndi vara..