Sleppa líklega um 6000 löxum

Búast má við að laxveiðimenn sleppi aftur um það bil 6.000 löxum sem þeir veiða í sumar ef sleppihlutfallið verður álíka og í fyrra. Þá var tæplega sextán prósentum veiðinnar sleppt aftur eða rösklega 5.300 löxum. Ef hlutfallið verður það sama í ár verður talan hærri því heildarveiðin er talsvert meiri í ár en í fyrra. Reyndar var hlutfallið í fyrra örlítið lægra en árið áður en kunnugir telja að það hafi verið tilviljun fremur en að veiðimenn séu orðnir nískari á laxinn. Að sleppa laxi, einkum stórlaxi, er talið styrkja stofnana í ánum þar sem þeir ná þá að hrygna og viðhalda stofnunum. Skiptar skoðanir hafa verið um það hvort stórlaxar lifa og hrygna eftir að hafa tekið slaginn við veiðimann og verið landað. Án þess að það taki af öll tvímæli í málinu þá er fréttastofunni kunnugt, með vissu, um lax sem hefur verið veiddur þrisvar á tveimur árum. En það er ekki hugsjónin ein sem ræður þessum sleppingum. Fréttastofan veit nokkur dæmi þess að laxveiðimenn, einkum þeir sem fara oft að veiða yfir sumarið, nenna hreinlega ekki að hirða stórlaxa ef þeir þurfa að burðast með þá langa leið upp í jeppann. Svo er löngu liðin tíð að menn reyni að veiða fyrir veiðileyfinu enda er lax ekki orðinn dýrari en ýsa út úr búð.