Fáir vitja reiðhjóla til lögreglu

Tilkynnt hefur verið um 293 týnd eða stolin reiðhjól það sem af er þessu ári, í fyrra voru hjólin alls 345. Hörður Jóhannesson, yfirlögregluþjónn hjá lögreglunni í Reykjavík, segir eitt til tvö hundruð hjól, sem finnast hingað og þangað um borgina, vera komið til lögreglu á ári hverju. Ekki séu þó margir sem komi og vitji um hjólin. Reiðhjólauppboð er hjá lögreglunni einu sinni á ári og eru þá boðin upp öll þau hjól sem hafa verið í vörslu lögreglunnar í að minnsta kosti eitt ár. Hörður Jóhannesson segir uppboðið ávallt vera vel sótt. Að minnsta kosti eitt hundrað hjól seljist í hvert skipti. Hann segist ekki vita ástæðu þess að fáir komi og vitji um hjól sín hjá lögreglunni. Hugsanlega hafi fólk þegar fengið hjólin bætt hjá tryggingunum eða kannski þyki fólki hjól ekki vera dýr og kaupi einfaldlega nýtt hjól. "Ef reiðhjól eru skilin eftir ólæst getur fólk ekki vænst þess að koma að hjólinu sínu á sama stað aftur. Við hvetjum fólk til að læsa hjólunum við fasta hluti og nota viðurkennda lása," segir Einar Guðmundsson, forvarnafulltrúi Sjóvá-Almennra. Reiðhjól eru tryggð í fjölskyldutryggingum, en í flestum tryggingum er einhver sjálfsábyrgð. Til að fá hjól, sem hefur verið stolið, bætt þarf að tilkynna þjófnaðinn til lögreglu og fara með lögregluskýrsluna ásamt kvittun fyrir hjólinu til tryggingafélagsins. Í flestum hjólaverslunum er hægt að fletta upp hvenær hjól voru keypt og hvað þau kostuðu. Þá þarf hjólið að hafa verið læst með viðurkenndum lás. Einar hvetur fólk til að læsa alltaf hjólum sínum við fastan hlut og festa lásinn við afturdekk eða grindina sjálfa en ekki við framhjólið því auðvelt sé að ná því af. Reiðhjólaeigendur hafa komið að framhjólinu einu eftir. Einar segir mikilvægt að geyma hjól alltaf inni í geymslum þar sem því verður komið við.