Ein með öllu á enda

Lögreglu á Akureyri bárust tilkynningar um nauðgun og líkamsárás í nótt. Þá komu upp óvenju mörg fíkniefnamál eða 46 talsins. Að öðru leyti gekk helgin stórslysalaust fyrir sig á Akureyri, þar sem haldin var fjölskylduhátíðin Ein Með Öllu. Mikill fjöldi manna kom saman á Akureyri um helgina og líklega hefur fjöldinn farið yfir þrjátíu þúsund að heimamönnum meðtöldum þegar mest lét. Að sögn Daníels Guðjónssonar yfirvarðstjóra lögreglunnar á Akureyri gekk helgin að mestu leyti vel með tilliti til alls þess fjölda sem saman var kominn í bænum til að skemmta sér. Hann segir þó eina nauðgun hafa verið kærða til lögreglu í nótt og er málið í rannsókn. Þá hafi ein líkamsárás átt sér stað í nótt, þar sem maður nefbrotnaði og missti nokkrar tennur, þegar hann var barinn með barefli. Alls komu upp 46 fíkniefnamál á Akureyri um helgina, þar af 16 í nótt. Að sögn Daníels var í flestum tilvikum um minniháttar magn af amfetamíni og hassi að ræða. Í gærkvöldi var haldinn Brekku- og stúkusöngur, sem ásamt langeldi markaði endann á þriggja daga skemmtidagskrá helgarinnar á Akureyri. Fjölskylduhátíðinni Einni með Öllu lauk svo formlega laust fyrir klukkan hálf tólf í gærkvöldi með flugeldasýningu. Þeir hörðustu hafa þó eflaust haldið áfram að skemmta sér vel fram eftir nóttu, enda var fólk ekkert að flýta sér á lappir í morgun og allt með kyrrum kjörum á Tjaldstæðinu vel fram eftir degi. Fólk hóf þó að týnast á brott þegar síga tók á seinni partinn.