Lækkað hefur í Jöklu

Verulega hefur lækkað í Jökulsá á Dal frá því í flóðinu í síðustu viku en búist er við vatnavöxtum síðar í vikunni. Breytingarnar á varnarstíflunni kosta tugi milljóna króna en framkvæmdirnar eru engu að síður vel innan kostnaðaráætlunar. Unnið var að viðgerðum á brúnni yfir Jökulsá á Dal í dag en hún skemmdist nokkuð í flóðunum í síðustu viku. Rennsli í ánni var í meðallagi í dag. Sigurður Arnalds, talsmaður Landsvirkjunar, segir hlýindanna sem færðust yfir landið í dag farið að gæta í Vatnajökli en það sé ekki farið að skila sér í ánni. Það muni varla gerast fyrr en í fyrsta lagi á morgun.  Fjórir samverkandi þættir ollu flóðunum í síðustu viku: hiti, sól, rigning og vindur. Búist er við að a.m.k. muni hiti og sól hafa sín áhrif á morgun og eru menn eystra búnir undir mikið flóð. Sigurður segir ekki víst að það verði meira en var sl. fimnmtudag en menn vilji hafa varann á. Þess vegna hafi varnarstíflan verið hækkuð meira en það er tiltölulega lítil og ódýr aðgerð að sögn Sigurðar.  Stíflan er nú komin í 50 metra hæð. Sigurður segir að hönnun varnarstíflunnar hafi ekki verið vanhugsuð, hjáveitugöng hafa ekki virkað eins og til var ætlast og hefur það haft sín áhrif. Ekki er vitað hvað veldur, annað hvort hefur hrunið í göngunum eða lofttappi myndast þar en í dag voru boraðar loftholur ofan í göngin sem anda nú ótt og títt. Ljóst er að þessar breytingar á varnarstíflunni kosta sitt. Sigurður segir að kostnaðurinn muni verða einhverjir tugir milljóna en menn verði að átta sig á því að kostnaðurinn við byggingu Kárahnjúkavirkjunar sé 85 milljarðar, og tíu milljörðum meira með hjáspennuvirkjum, og við slíkar framkvæmdir sé lagt til hliðar fyrir ófyrirséðum kostnaði. Hann segir dæmigert að það gangi á slíkan sjóð vegna þátta sem snerta jarðfræði eða vatn líkt og í þessu tilviki. Myndin er af Sigurði Arnalds, talsmanni Landsvirkjunar.