Hitamet slegin í dag?

Spáð er yfir tuttugu stiga hita víða um land í dag eftir að hlýtt loft tók að streyma inn á landið í nótt með þrumum og eldingum á Suðurlandi. Einar Sveinbjörnsson veðurfræðingur býst allt eins við að ný hitamet verði slegin í dag. Hann segir að afskaplega heitt loft hafi borist til landsins en hins vegar sé sólskin alls ekki mikið. Einar segir hitafarið síðastliðna nótt með eindæmum og að einhver met hafi verið slegin, sérstaklega í tengslum við hitamet að nóttu. Hitinn fór yfir 20 stig á nokkrum stöðum á Suðurlandi og að sögn Einars er mjög athyglisvert að hitastigið fór upp í 18 stig á Stórhöfða klukkan 3 í nótt. Einnig hækkaði hitinn í Skaftafelli í alla nótt og var kominn upp í 23 stig klukkan 6 í morgun. Þar á sólin vitanlega engan þátt. Klukkan 10 var hitinn þar orðinn 25 stig. Einar segir líkur á því að hitinn hafi farið yfir 20 stig í Reykjavík sem aðeins hefur gerst þrisvar sinnum í ágústmánuði  á síðustu öld. Hvað landið allt varðar segir Einar ekki vera tiltakanlega hlýtt, enn sem komið er, víðast hvar. Aðspurður hvaðan hlýja loftið komi segir Einar það koma að stofninum til úr suðaustri þar sem það hafi legið yfir Skandinavíu og Norður-Evrópu síðustu vikurnar. Inn í þetta blandast svo hlýtt loft úr leifum af fellibylnum Alex sem er kyrrstæður fyrir vestan Írland. Einar segir líkur á því að hlýindin vari mestalla vikuna og nái hámarki á þriðjudag eða miðvikudag. Hann á líka von á að léttara verði yfir hvað skýjafar varðar þegar líður á vikuna. Hægt er að hlusta á viðtal við Einar úr hádegisfréttum Bylgjunnar með því að smella á hlekkinn hér að neðan. Myndin er frá Þingvöllum.