Ægir bikarmeistari í sundi

Ægir vann glæsilegan sigur í bikarkeppni Sundsambands Íslands sem fram fór í síðasta sinn í Sundhöllinni í Reykjavík. Ægismenn kvöddu Sundhöllina með því að setja félagsmet, náðu í 29.314 stig og unnu í kjölfarið yfirburðasigur í bæði karla- og kvennaflokki. Bikarmeistarar síðustu tveggja ára, ÍRB, enduðu í öðru sæti, 2.408 stigum á eftir Ægi, og SH varð síðan í þriðja sæti með 26.398 stig. Breiðablik fellur í 2. deild en í staðinn tryggði Sundfélagið Óðinn frá Akureyri sér sæti í 1. deildinni. Bikarkeppni Sundsambands Íslands hefur farið fram í Sundhöllinni síðan 1968 eða í 36 ár en á næsta ári mun vera keppt í nýju glæsilegu innilauginni í Laugardal. "Við erum bara með breiðari hóp en hin liðin.Í fyrra vorum við ekki stemmd fyrir mótið, bæði þreytt og pirruð, en núna vorum við öll tilbúin í slagin," sagði Jakob Jóhann Sveinsson, fyrirliði Ægis. "Við vorum miklu léttari í undirbúningnum fyrir mótið í ár en undanfarin tvö ár," sagði Jakob, sem var einn fárra í liðinu sem var með fyrir þremur árum þegar Ægir vann síðast. "Árið 2001 vorum við meistarar en árið eftir misstum við 9 eða 10 sundmenn úr því liði og við þurftum að byggja aftur upp lið sem er að koma upp núna. Við erum ekki nema þrjú eða fjögur eftir úr því liði. Við unnum fyrsta bikarmeistaratitilinn í Sundhöllinni og vinnum einnig þann síðasta og það er einstakt," sagði Jakob Jóhann. Stelpurnar í Ægi unnu stigakeppnina með 1.397 stiga mun og þær settu þrjú Íslandsmet á mótinu. Anja Ríkey Jakobsdóttir úr Ægi bætti eigið met í 100 m baksundi og synti á 1:02,94 en gamla metið hennar var 1:03,10. Þá setti kvennasveit Ægis Íslandsmet í bæði 4x100 metra fjórsundi og 4x100 metra skriðsundi. Aníta Ýr er ein af þeim sem gengu til liðs við Ægi í haust og hún tók þátt í öllum þremur metunum "Þetta var rosalega gaman og við erum geðveikt ánægð," sagði Aníta Ýr. "Við ætluðum okkur að vinna þetta og rústa þessu bara. Það eru allir í toppformi, þó að við séum með mjög ungt lið eru allir að skila sínu og við erum svo góð sem ein liðsheild," sagði Aníta Ýr og brosti út að eyrum enda ekki í hverri bikarkeppni sem sundmaður nær að setja þrjú Íslandsmet um sömu helgi.