Ætluðu að kveikja í leikmannarútu

Sænskar fótboltabullur, sem földu 27 bensínsprengjur fyrir utan Råsundaleikvanginn í Stokkhólmi síðastliðinn mánudag þegar grannaliðin AIK og Hammarby mættust, ætluðu að nota bensínsprengjurnar til þess að kveikja í leikmannarútu AIK liðsins. Þetta hefur sænska Aftonbladet eftir lögreglunni í Stokkhólmi í morgun en óeinkennisklæddir lögreglumenn sem voru í áhorfendastúkunni fengu vitneskju um þessara fyrirætlanir meðan á leiknum stóð. Þröngur hópur stuðningsmanna AIK, fótboltabullur sem kallast svarti herinn og hefur tengsl inn í hreyfingu nýnasista í Svíþjóð, hefur margoft komist í kast við lögin undanfarin ár. Liði þeirra hefur gengið illa í ár og er í næst neðsta sæti sænsku úrvalsdeildarinnar. Það sætta fótboltabullurnar sig ekki við og því átti að kveikja í leikmannarútu liðsins. Sænska knattspyrnusambandið dæmdi AIK til þess að spila næstu tvo heimaleiki liðsins fyrir luktum dyrum, auk 10 milljón króna sektar eftir óeirðir stuðningsmanna liðsins gegn Hammarby síðastliðinn mánudag.