Drengur lést í Bláa lóninu

Hörmulegur atburður átti sér stað í Bláa lóninu í dag þegar 14 ára gamall piltur af erlendum uppruna lést. Sjúkrabílar frá Reykjavík og Keflavík voru kallaðir út ásamt lögreglu á þriðja tímanum í dag. Drengurinn var fluttur í skyndi á bráðamóttöku Landsspítala Háskólasjúkrahús við Hringbraut en lífgunartilraunir báru ekki árangur. Víkurfréttir greina frá þessu. „Þetta er hörmulegur atburður og við erum mjög leið yfir þessu,“ segir Anna G. Sverrisdóttir, aðstoðarframkvæmdastjóri Bláa lónsins. Að sögn fósturforeldra drengsins var hann með sjúkdóm en ekki er vitað hvers kyns hann var að svo stöddu. Hæsta viðbúnaðarstig var í lóninu eftir að upp komst um slysið og var öllum baðgestum vísað frá að sinni. „Starfsmenn Bláa lónsins fundu drenginn fljótlega eftir að farið var að svipast um eftir honum,“ segir Anna og bætir því við að þeir hefðu brugðist snarlega við og hafið lífgunartilraunir um leið og drengnum hafði verið komið á þurrt. Sjónarvottar voru harmi slegnir og bauðst starfsmönnum Bláa lónsins áfallahjálp eftir atburðinn. Mynd: Víkurfréttir/Atli Már Gylfason