Stíflan komin í 488 metra

Bráðabirgðastífla við Kárahnjúka, sem lak meðfram í gær inn á vinnusvæðið í gljúfrinu fyrir neðan, er komin í 488 metra. Stefnt er að því að hún verði komin í 490 metra á næsta sólarhring en verkið er tímafrekt þar sem stíflan er tuttugu og fimm metra breið. Unnið er hörðum höndum að því að koma í veg fyrir frekara vatnstjón og er þannig verið að bora holu í fjallið, ofan við hjáveitugöngin, sem hafa ekki annað vatnsmagni þegar vatnsborð Jökulsár á Dal hefur hækkað. Er það gert til að tappa lofti úr hjáveitugöngunum í þeirri von að þau flytji meira vatn frá stíflunni. Dælur sem dæla vatni af vinnusvæðinu dæla 200 lítrum á sekúndu og munu dæla samtals 700 lítrum þegar fleirum hefur verið bætt við. Þá er áætlað að þær muni  dæla meiru út en flæðir inn á svæðið.