Áhersla lögð á Kjalarnes

Umfangsmikil leit björgunarsveita að Sri Rahmawati stendur nú yfir sem á annað hundrað björgunarsveitarmanna taka þátt í. Sérstök áhersla er lögð á leit á Kjalarnesi en þó verður farið um allt stór-Reykjavíkursvæðið. Ekkert hefur spurst til Sri frá 4. júlí síðastliðnum.  Björgunarsveitir Slysavarnarfélagsins Landsbjargar, allt frá Suðurnesjum upp í Borgarfjörð og að Selfossi, að meðtöldum sveitunum á höfuðborgarsvæðinu, taka þátt í leitinni sem hófst nú síðdegis. 125 manns taka þátt og hafa til umráða 25 björgunarsveitarbíla. Valgeir Elíasson hjá Landsbjörgu segir að leitarsvæðin séu 49 talsins og ekki mjög langt frá borginni. Flest þeirra séu helstu útivistarsvæði höfuðborgarsvæðisbúa. Hann segir að leitað hafi verið á sumum svæðanna áður. Aðspurður hvort vísbendingar liggi fyrir að Sri sé frekar að finna á þessum svæðum en öðrum segir Valgeir að það sé bara byggt sé á þeim gögnum sem leitað hafi verið eftir hingað til.  Hann býst að lokið verði leit á þessum 49 svæðum fyrir helgina en leit mun hefjast um klukkan fimm síðdegis alla dagana, eða eftir vinnu björgunarsveitarmanna. Þar sem ekki er um lífleit að ræða fer leitin fram að loknum vinnutíma leitarmanna. Valgeir segir þá vita að hverju þeir ganga.