10 þúsund manns á Gaddstaðaflötum

Talið er að um 10 þúsund manns séu á Landsmóti hestamanna á Gaddstaðaflötum við Hellu og mikil ölvun var á mótssvæðinu í nótt. Að sögn lögreglu er fjöldi fíkniefnamála og það magn sem lagt hefur verið hald á ákveðið áhyggjuefni. Frá því á föstudag hefur lögreglan á Hvolsvelli lagt hald á 41 gramm af hvítu efni sem talið er vera kókaín eða amfetamín. Auk þess hefur verið lagt hald á nokkur hylki með glærum vökva, sem ætla má að séu deyfi- eða sljóvgunarlyf, og hass og hassblöndu. Fangageymslur voru fullnýttar í nótt þar sem fimm menn gistu vegna óspekta, fíkniefnamála og minni háttar líkamsmeiðinga. Meðal þess sem fram fer á Landsmóti í dag eru B-úrslit, fljúgandi skeið og úrvalssýning kynbótahrossa sem hefst klukkan 11.