Á móti sameiningu sveitarfélaga

Sveitarstjórnarmenn á Suðurnesjum hafa lagst gegn tillögu Árna Magnússonar félagsmálaráðherra um sameiningu allra sveitarfélaganna á Suðurnesjum í eitt. Tillagan er hluti af áætlun um að fækka sveitarfélögum á landinu á næsta ári um 64, úr 103 í 39. Hörður Guðbrandsson, forseti bæjarstjórnar í Grindavík, segir félagsmálaráðherra fullyrða að tillagan sé lögð fram eftir samráð við sveitarstjórnir á svæðinu. Það standist þó varla skoðun þar sem bæjarstjórnir Grindavíkur, Garðs og Sandgerðis hafi lagst gegn sameiningu. Aðeins bæjarstjórn Reykjanesbæjar hafi verið henni fylgjandi. "Ég held að ætlunin sé að við greiðum upp skuldir Reykjanesbæjar því Grindavík stendur mun betur fjárhagslega en við samþykkjum það ekki." Hörður segist viss um að Grindvíkingar kjósi gegn sameiningunni. "Síðast var kosið um sameiningu árið 1993 og þá voru níu af hverjum tíu andsnúnir henni. Ég held að andstaðan í bænum hafi aukist síðan þá og ég heyri engan í bænum mæla með henni." Bæjarráð Grindavíkur hefur boðað fulltrúa ráðuneytisins á sinn fund í næstu viku vegna málsins.