Yfirheyrsla

Hvernig telur þú starfsaðferðir Coca-Cola breytast í Evrópu eftir samkomulagið við ESB? Ég hugsa að engar stórfelldar breytingar verði á störfum Coca-Cola. Ég tel að menn hafi verið farnir að vinna eftir þessum reglum áður en samkomulagið var gert því þeir sáu í hvað stefndi. Hefur samkomulagið áhrif á markaðshlutdeild Kók? Ég sé það ekki í hendi mér. Hvaða afleiðingar hefðu sambærilegar reglur á Kók á Íslandi? Svipaðar og í Evrópu; sem sagt ekkert stórkostlegar. Við höfum að mestu leyti verið að vinna eftir þessum reglum því ljóst er að þær koma einnig til með að gilda á Íslandi. Þorsteinn M. Jónsson, forstjóri Vífilfells, sat fyrir svörum. Margra ára deilu Evrópusambandsins og Coca-Cola lauk með samkomulagi á þriðjudag. Í stað fjársekta samþykkti fyrirtækið að hætta að semja um einkarétt á gosdrykkjasölu í búðum og á veitingastöðum. Það verður einnig að heimila verslunum að setja gosdykki annarra framleiðenda í kæliskápa sem merktir eru fyrirtækinu.