Kennarar í kröfugöngu

Grunnskólakennarar og stuðningsmenn þeirra fjölmenntu í kröfugöngu í miðborg Reykjavíkur í dag, nú þegar verkfall hefur staðið yfir í heilan mánuð. Á þessum tímamótum minntu kennarar rækilega á málstað sinn. Þeir söfnuðust saman klukkan þrjú á Hlemmi og gengu síðan með kröfuspjöld á lofti niður Laugaveginn, um Bankastræti og Austurstræti en leiðin lá að Ingólfstorgi þar sem haldinn var útifundur. Talsmenn þeirra sögðu að þrjú þúsund manns hefðu tekið þátt í þessum aðgerðum í dag en þær fóru friðsamlega fram. Verkfallið snertir stóran hluta þjóðlífsins, ekki aðeins þá 4500 kennara sem krefjast hærri launa, heldur einnig 30 þúsund heimili 45 þúsund grunnskólabarna. Allt situr enn fast í viðræðum fulltrúa kennara og sveitarfélaga og hefur í raun ekkert miðað að undanförnu. Samningamenn deiluaðila hafa fundað í Karphúsinu í dag en nú rétt fyrir fréttir fengust þær upplýsingar þaðan að þar væri ekkert að gerast. Ekkert nýtt hefði komið fram sem orð væri á gerandi. Að útifundinum loknum hélt kröfugangan áfram. Gengið var framhjá Alþingishúsinu og enn minnt á þá kröfu að ríkisvaldið yrði að koma að málinu ef lausn ætti að finnast. Þaðan var farið að Ráðhúsinu og stjórnendur stærsta sveitarfélags landsins minntir á kröfurnar.