Kokkar heimsóttu leikskóla

Matreiðslumenn heimsóttu í gær 30 leikskóla í Reykjavík með það fyrir augum að kynna hollan mat og gott mataræði. "Við gerum þetta í tilefni af alþjóðlega kokkadeginum sem er haldinn hátíðlegur í fyrsta sinn. Ákveðið var að leggja áherslu á mikilvægi góðs mataræðis og þótti okkur því eðlilegt að kynna það börnunum sem vonandi búa að fræðslunni áfram," sagði Gissur Guðmundsson, forseti Klúbbs matreiðslumeistara á Íslandi og Norðurlöndum. Gert var ráð fyrir að tveir til þrír faglærðir matreiðslumenn og matreiðslunemar heimsæktu hvern leikskóla til að sýna listir sínar og fræða börnin. Ákveðið var á síðasta alheimsþingi matreiðslumanna (WACS), í Dyflinni á Írlandi í mars, að samtökin myndu árlega halda þriðja miðvikudag í október hátíðlegan til kynningar á matreiðslu. Í Alheimssamtökum matreiðslumanna eru 72 þjóðir með um 8 milljónir félagsmanna og fer aðildarþjóðum ört fjölgandi, að því er fram kemur í tilkynningu Klúbbs matreiðslumeistara á Íslandi og Norðurlöndum.