Ein mínúta um lýðræði og ungt fólk

Tuttugu ungmenni frá Íslandi, Grænlandi, Færeyjum, Danmörku, Svíþjóð, Noregi og Finnlandi eru samankomin í Reykjavík til þess að vinna að framleiðslu einnar-mínútu myndbanda um lýðræði og þátttöku ungs fólks í samfélaginu. Það er barnahjálp Sameinuðu þjóðanna á Íslandi og menntamálaráðuneytið sem standa að vinnusmiðjunni sem lýkur í dag. Vinnusmiðjan er haldin hér á landi í tengslum við ráðstefnu Norrænu ráðherranefndarinnar um "Menntun og þátttöku ungs fólks" sem haldin verður á Selfossi. Eftir vinnusmiðjuna munu ungmennin sitja ráðstefnuna og sýna myndböndin. Ríkissjónvarpið, sænska sjónvarpsstöðin SVT og finnska stöðin YLE munu framleiða 25 mínútna heimildarmynd um vinnusmiðjuna og verður hún sýnd á stöðvunum síðar á árinu. Vinnusmiðja einnar-mínútu-myndbanda hefur verið haldin víða um heim síðan árið 1999.