ME heldur upp á 25 ára afmæli

Menntaskólinn á Egilsstöðum heldur um þessar mundir upp á 25 ára afmæli sitt. Formleg hátíðarhöld verða á laugardaginn og lýkur þeim með dansleik um kvöldið. Menntaskólinn á Egilsstöðum var stofnaður árið 1979. Frá upphafi hafa tæplega þúsund nemendur verið brautskráðir sem stúdentar og allnokkur fjöldi nemenda af styttri námsbrautum. Rúmlega 370 nemendur stunda nú nám í dagskóla og nálægt 100 í kvöldskóla. Skólinn er bóknámsskóli en einnig er starfrækt listnámsbraut og íþróttabraut auk nokkurra annarra starfsnámsbrauta.