Rækjuveiðar bannaðar

Rækjustofnarnir í Ísafjarðardjúpi og Arnarfirði virðast vera að hruni komnir og leggur Hafrannsóknastofnun til að allar rækjuveiðar á þessum svæðum verði bannaðar í vetur. Þetta er niðurstaða vísindamanna eftir árlegan rannsóknaleiðangur um svæðin. Frá því að athuganir stofnunarinnar hófust hefur aldrei fundist jafn lítið af rækju og nú í Ísafjarðardjúpi, auk þess sem stærð rækjunnar sem fékkst í Arnarfirði, er líka langt undir meðallagi. Rækjan fanst aðeins á mjög takmörkuðu svæði norðan Langaness Í Arnarfirði og var heildarstofnvísitalan og vísitala kvendýra langt undir meðallagi. Mikið fannst af þorski, ýsu og lýsu, en þessar tegundir éta rækju, einkum þorskurinn. Rækjan er króuð af á litlum svæðum. Sérfræðingar óttast að ef veiðar verði leyfðar í litlu magni þar sem rækjan heldur sig, kunni hún að dreifast á slóð þessara fiska með ófyrirsjáanlegum afleiðingum. Rækjuveiði var bönnuð í Ísafjarðardjúpi og voru innfjarðarækuveiðar aðeins leyfða í Arnarfiði, sem nú verða væntanlega bannaðar líka. Fyrir utan alll marga rækjubáta við Ísafjarðardjúp, sem ekki fengu að veiða síðastliðinn vetur, bætast nú við níu bátar, sem hafa stundað veiðarnar á Arnarfirði.