Árni Már varð Norðurlandameistari

Árni Már Árnason, sundfélaginu Ægi, varð í gær Norðurlandameistari í 100 metra bringusundi á Norðurlandamóti unglinga í sundi sem fram fór um helgina í Nærum í Danmörku. Árni Már kórónaði þar með frábæra helgi sína en hann hafði áður unnið til tveggja silfurverðlauna í 50 og 200 metra bringusundi auk þess að vera í piltasveitinni í 4 x 100 metra fjórsundi sem vann til bronsverðlauna. Alls unnu íslensku krakkarnir til sjö verðlauna á mótinu, eins gulls, fjögurra silfurverðlauna og tveggja bronsverðlauna. Íslenska liðið hafnaði í fjórða sæti í stigakeppninni á undan Noregi, Eistlandi og Færeyjum en það er ekki nóg með að árangurinn hafi verið góður og að nánast allt íslenska sundfólkið hafi bætt sig þá var frábær stemning í íslenska hópnum og vakti liðsandi Íslendinganna mikla athygli. Árni Már Árnason náði fyrst öðru sætinu í 200 metra bringusundi á föstudagskvöldið þegar hann synti 2:16,89 mínútum, skömmu seinna náði hann bronsverðlaunum og setti Landssveitarmet með piltasveitinni í 4 x 100 metra fjórsundi en auk hans voru í sveitinni Birkir Már Jónsson, ÍRB (baksund), Hjalti Rúnar Oddsson, Selfossi (flugsund) og Jón Símon Gíslason Ægi (skriðsund) en Árni Már synti að sjálfsögðu bringusundið þar sem hann er bestur. Á laugardeginum nældi Árni Már sér í silfur í 50 metra bringusundi þar sem hann synti í fyrsta sinn undir 30 sekúndum (29,77) og vann síðan gullið í 100 metra bringusundinu í gær þegar að hann synti á 1:03,51 mínútu. Árni Már var auk þess rétt við það að komast á verðlaunapall í 50 metra skriðsundi þar sem hann endaði í fjórða sæti. Þrjár stelpur náðu einnig í verðlaun á mótinu. Auður Sif Jónsdóttir úr Ægi vann brons á föstudaginn í 800 metra skriðsundi þegar hún synti á 9:06,14 mínútum, Sigrún Brá Sverrisdóttir úr Fjölni vann silfur og setti telpna- og stúlknamet í 100 metra skriðsundi þegar hún synti á 57,31 sekúndum og þá vann Jóhanna Gerða Gústafsdóttir úr Ægi silfur í 400 metra fjórsundi þegar hún setti telpnamet og synti á 5:00,38 mínútum. Jóhanna Gerða bætti metið um heilar átta sekúndur og er aðeins rétt við það að komast undir fimm mínútna markið sem er frábær árangur. Auk þessa setti Birkir Már Jónsson úr ÍRB piltamet í 200 metra flugsundi (2:07,13 mín.). Jóhanna Gerða var aðeins 13 sekúndubrotum frá því að vinna til verðlauna í 200 metra baksundi og piltasveitin í 4 x 200 metra skiðsundi setti Landssveitarmet.