Vill lyfjainnfluting af hálfu ríkisins lagist lyfjaverð ekki

Formaður lyfjagreiðslunefndar telur að ríkið ætti að taka upp innflutning á lyfjum að nýju, fari lyfjaheildsalar og framleiðendur ekki að taka upp breytta stefnu í sambandi við lyfjaverð.

Úthluta peningum hreppsins til íbúa

Skilmannahreppur hefur boðið hverju heimili 600 þúsund króna framlag úr búsetusjóði hreppsins til þess að fegra umhverfið. Er þetta gert nú, fyrir sveitarstjórnarkosningar, áður en hreppurinn sameinast þremur öðrum hreppum.

Vandi við verðhrun fasteigna

Verðlækkun á húsnæði getur haft uggvænleg áhrif á skuldsett heimili og telur Ráðgjafarstöð um fjármál heimilanna að afar margir standi tæpt. Seðlabankinn hefur bent á að þetta sé stærsta áhyggjuefni heimilisfjármála og ekki sé óalgengt að fasteignaverð lækki um fimmtán til tuttugu prósent í kjölfar mikilla hækkana eins og verið hafa undanfarið. Dæmi séu einnig um allt að 50 prósenta verðlækkun.

Íbúum boðið frítt í sund

Íbúum Reykjanesbæjar er boðið í sund milli 13 og 17 næsta laugardag. Þá verður opnuð ný 50 metra löng innilaug og vatnaveröld í Sundmiðstöðinni við Sunnubraut. Af því tilefni bjóða Reykjanesbær og Fasteign hf öllum íbúum frítt í sund.

Búist við að það dragi áfram úr innflutningi

Búast má við því að það haldi áfram að draga úr innflutningi á neysluvörum. Verulega dró úr innflutningi á bílum, sjónvörpum og fleiri neysluvörum í aprílmánuði.

Skóflustunga tekin að nýrri sundmiðstöð í Hafnarfirði

Skóflustunga að nýrri sundmiðstöð í Hafnarfirði var tekin í dag. Formaður byggingaráðs bæjarins segir framkvæmdina mikla lyftistöng fyrir Hafnarfjarðarbæ.

Dómarinn þarf ekki að víkja

Hæstiréttur hafnaði rétt í þessu beiðni Jóns Geralds Sullenbergers um að dómari í máli hans og þeirra Jóns Ásgeirs Jóhannessonar og Tryggva Jónssonar viki frá málinu.

Hugmyndir um flutning Árbæjarsafns vanhugsaðar

Hugmyndir stjórnmálamanna um flutning hluta af Árbæjarsafns út í Viðey eru vanhugsaðar að mati starfsfólks safnsins. Það segir núverandi staðsetningu ekki hamla starfinu og vill byggja frekar upp í Árbænum og gera Elliðaárdalinn í nágrenninu að safnadal.

Rispuðu tíu bíla

Tveir ungir dregnir ollu skemmdum á tíu bílum á leið sinni heim úr skóla á Akranesi síðasta fimmtudag. Þeim kom í hug að taka upp stein og rispa þá bíla sem þeir gengu framhjá.

Lægstur lífeyrir og mesta tekjuskerðingin á Íslandi

Ellilífeyrir er lægstur hér á landi af öllum Norðurlöndunum og skerðist mest við aðrar tekjur. Á öllum Norðurlöndunum er svipað hlutfall ellilífeyrisþega sem lifir við fátæktarmörk. Þetta er niðurstaða aðalfundar norrænna eldri borgara sem fram fer í Reykjavík þessa dagana.

Dæmdur fyrir líkamsárás

Héraðsdómur Norðurlands eystra dæmdi karlmann í dag til fjögurra mánaða fangelsisvistar fyrir líkamsárás. Hann var hins vegar sýknaður af annarri ákæru um líkamsárás þar sem hún þótti ekki sönnuð.

Borgarafundur í Reykjanesbæ

Oddvitar framboðanna í Reykjanesbæ verða fyrir svörum á borgarafundi NFS í kvöld. Á borgarafundinum verður farið yfir stefnumál framboðanna, litið á aðstæður í Reykjanesbæ og niðurstöður nýrrar skoðanakönnunar birtar.

Vilja semja við sveitarstjórnarmenn

Opinberir starfsmenn á Suðurlandi vilja að sveitarstjórnarmenn semji við þá um kaup og kjör frekar en að fela Launanefnd sveitarfélaga fullnaðarumboð til saminga.

Sóknarfæri í umræðunni

Árni Mathiesen, fjármálaráðherra og Bjarni Ármannsson, forstjóri Glitnis, voru í morgun í viðtali á CNBC viðskiptafréttastöðinni. Í viðtalinu voru framtíðarhorfur íslensks efnahagslíf ræddar, verðbólgustigið, hækkanir á húsnæðisverði og vaxtahækkanir Seðlabankans. Pétur Þ. Óskarsson, forstöðumaður Kynningarmála og Fjárfestatengsla Glitnis, greindi frá því í viðtali við NFS að fyrirtækið hafi að undaförnum vikum aukið samskipti við erlenda fjölmiðla. Hann sagði neikvæðar spár um íslenskt efnahagslífs færri en áður og ekki eins einhliða og þær hefðu verið í fyrstu. Aukin umræða sem myndaðist í tengslum við þau mál hefðu þó vakið athygli á Íslandi og slíkt biði upp á frekari tækifæri.

Tvöföldun ljúki ári fyrr en áætlanir gerðu ráð fyrir

Allt bendir til að seinni áfanga við tvöföldun Reykjanesbrautar ljúki ári áður en áætlanir gerðu ráð fyrir. Þetta er er ein stærsta vegaframkvæmd þessa árs og næsta og mun bæta samgöngur milli Keflavíkur og höfuðborgarsvæðisins verulega.

Innflutningur og einkaneysla dragast saman

Verulega er farið að draga úr innflutningi á bílum, heimilstækjum og fatnaði samkvæmt bráðabirgðatölum Fjármálaráðuneytisins um innheimtu virðisaukaskatts í síðasta mánuði. Hann var verulega minni af þessum vöruflokkum en undanfarna mánuði.

Útlit fyrir að komið verði til móts við launakröfur

Útlit er fyrir að komið verði til móts við launakröfur ófaglærðra starfsmanna á heilbrigðis- og öldrunarstofnunum sem eru í eigu ríkisins eða þar sem ríkið greiðir laun. Starfsmenn á sumum stofnananna ræða hvort hætta eigi við fyrirhuguð setuverkföll sem boðuð hafa verið.

Börnin sýna í Mjóddinni

Samsýning 180 ungra listamanna var opnuð í göngugötunni í Mjódd í morgun. Listamennirnir ungu eru leikskólabörn af Fálkaborg, Arnarborg og Bakkaborg í Breiðholtinu. Listaverkin eru brot af því besta sem börnin hafa gert í vetur.

Hvert heimili fær 600 þúsund fyrir sameiningu

Oddviti Skilmannahrepps við Hvalfjörð gengur nú á milli bæja og býður hverju heimili 600 þúsund króna framlag úr sjóði hreppsins, í formi vöruúttektar í BYKO eða Húsasmiðjunni, áður en hreppurinn sameinast þremur öðrum hreppum í sumar.

Hitaveiturör sprakk við Hlemm

Nokkur hætta skapaðist þegar hitaveiturör á mótum Laugavegar og Rauðarárstígs sprakk og vatn flæddi upp á götuna. Lögregla var kölluð á vettvang til að halda fólki frá enda var vatnið áttatíu gráðu heitt.

Argóarflísin til Svíþjóðar

Sænska bókaforlagið Alafabeta hefur keypt útgáfuréttinn á Argóarflísinni eftir Sjón, handhafa bókmenntaverðlauna Norðurlandaráðs. Í fréttatilkynningu frá Bókaforlaginu Bjarti, sem annaðist útgáfu bókarinnar, segir að þessar fréttir hafi ekki komið á óvart þar sem völva hafi spáð bókinni frægð og frama í áramótahefti Séð og heyrt.

Skora á sveitarstjórnarmenn að semja sjálfir við félagið

Félag opinberra starfsmanna á Suðurlandi skoraði á sveitarstjórnarmenn á Suðurlandi að koma meira að kjarasamningagerð við félagið í stað þess að fela Launanefnd sveitarfélaga fullnaðarumboð. Þetta kom fram á aðalfundi félagsins sem haldið var á Selfossi í gær.

Nýr forstjóri MP Fjárfestingabanka

Styrmir Þór Bragason hefur verið ráðinn framkvæmdastjóri MP Fjárfestingarbanka hf. og hefur hann störf þegar í stað. Styrmir er 35 ára og starfaði hann áður sem sérfræðingur fyrirtækjasviði Landsbankans en þar áður framkvæmdastjóri Atorku Group hf.

Íslenskt fyrirtæki verðlaunað

Íslenska fyrirtækið Industria hlaut í gær Red Herring Europe 100-verðlaunin, sem ár hvert er útdeilt af samnefndu viðskiptatímariti. Meðal þeirra fyrirtækja sem hampað hafa slíkum titli í gegnum tíðina eru til að mynda Google, eBay og Skype.

Komu að þjófum heima hjá sér

Styggð kom að þjófum sem voru að athafna sig í einbýlishúsi á Akureyri í gærkvöldi þegar íbúarnir komu óvænt heim. Þjófarnir forðuðu sér í ofvæni út um bakdyr og náðu ekki að nema neitt á brott með sér en þeir voru búnir að safna saman og stafla upp ýmsum verðmætum sem þeir hafa ætlað að stela.

Um sextíu togarar að karfaveiðum á Reykjaneshrygg

Rétt tæplega sextíu togarar eru að karfaveiðum á Reykjaneshrygg, suðvestur af landinu, samkvæmt talningu Landhelgisgæslunnar í gær. Þar af eru átta íslenskir togarar en í heild er þetta einhver stærsti floti sem hefur verið þarna að veiðum í einu til þessa.

Ætla ekki að taka þátt í umfjöllun um Baug í Kastljósi

Jón Ásgeir Jóhannesson forstjóri Baugs, Hreinn Loftsson stjórnarformaður Baugs og verjendur Jóns Ásgeirs og Tryggva Jónssonar, fyrrverandi aðstoðarforstjóra Baugs, þeir Gestur Jónsson og Jakob Möller Hæstaréttarlögmenn, hafa sent frá sér yfirlýsingar vegna umfjöllunar um Baugsmálið í Kastjósi Ríkissjónvarpsins í gær.

Slökkviliðið kallað þrettán sinnum út vegna sinuelda

Slökkviliðið í Reykjavík var kallað þrettán sinnum út í gær vegna sinuelda, einkum í Elliðaárdal en ekki hlaust þó umtalsvert tjón af svo vitað sé. Ljóst er að í mörgum tilvikanna hefur viljandi verið kveikt í en enginn hefur verið handtekinn vegna þess.

Færður á geðdeild eftir að hafa veifað hnífi

Maðurinn, sem lögreglan í Reykjavík handtók á leikskóla í vesturborginni, eftir að hann reyndist hafa hníf undir höndum þegar hann hugðist sækja barn fyrrverandi sambýliskonu sinnar, var í gærkvöldi vistaður á geðdeild.

Varmársamtökin stofnuð til verndar Varmársvæðinu

Varmársamtökin, samtök íbúa í Mosfellsbæ, voru stofnuð formlega í kvöld. Forsvarsmenn samtakanna vilja að Varmársvæðið verði skipulagt með menningu og útivist í huga.

Skaðabætur vegna myndbirtingar DV?

Ekki verður annað séð en stúlkan á myndinni sem birt var ranglega í DV síðastliðinn laugardag eigi rétt á skaðabótum, ekki síst í ljósi dómsins í máli Bubba Morthens gegn Hér og nú. Þetta segir kennari við lagadeild Háskólans í Reykjavík.

Brotalöm á rannsókninni

Verjandi Jónasar Garðarssonar gagnrýndi rannsókn sjóslysins í Héraðsdómi í dag og sagði vafa í málinu það mikinn að ekki væri hægt að dæma Jónas. Saksóknari telur hins vegar óhyggjandi sannanir fyrir því að Jónas hafi stýrt skemmtibátnum Hörpu þegar hann steytti á Skarfaskeri en tvennt lést í slysinu.

Mikið um sinuelda

Slökkvilið höfuðborgarsvæðisins hefur haft í nógu að gera við að slökkva sinuelda. Laust fyrir fréttir var búið að kalla slökkviliðið níu sinnum út vegna sinuelda og þykir það í hærri kantinum.

Krónan heldur áfram að styrkjast

Krónan styrktist um 0,7% í dag og endaði gengisvísitalan í 125,3 stigum. Krónan styrktist um 2,5% í síðustu viku en þessi styrking kemur eftir útgáfu á tveimur skýrslum um fjármálastöðugleika á Íslandi.

Ekki vera í skærlitum fötum

Fólk sem á leið nærri Ástjörn í Hafnarfirði á að forðast að klæðast skærlitum fötum og ekki vera með hávaða eða annan skarkala. Ástæðan er sú að fuglavarp er að hefjast og því er búið að takmarka umferð um friðlandið.

Segir föður sinn hafa verið við stýri bátsins

Ellefu ára sonur Jónasar Garðarssonar, vitnaði í Héraðsdómi í dag að faðir sinn hafi verið við stýrið skömmu eftir að bátur þeirra steytti á Skarfaskeri. Það sama sagði Matthildur Harðardóttir, sem lést í slysinu, í samtali við Neyðarlínuna. Jónas heldur því fram að Matthildur hafi verið við stýrið þegar skemmtibáturinn fórst en ákæruvaldið telur öll gögn benda til sektar Jónasar og krefst þriggja ára óskilorðsbundins fangelsisdóms yfir honum.

Vilja búsetuskyldu á lögbýli

Allt að tíföld hækkun jarðaverðs á undanförnum árum er farin að ógna hefðbundnum landbúnaði á Suðurlandi. Dæmi eru um að boðnar séu á milli tvö- og þrjúhundruð milljónir króna í einstaka jarðir. Oddvitar Hrunamannahrepps og Rangárþings eystra telja tímabært að menn hugi að því að setja búsetuskyldu á öll lögbýli.

Slasaðist á járnstöng

Tíu ára gamall drengur féll og datt á járnstöng við Rimaskóla um klukkan hálf fjögur í dag. Önnur framtönn drengsins brotnaði við fallið og var hann fluttur til tannlæknis sem gerði að sárum hans.

Maður með hníf í hendi kom á leikskólann Hagaborg

Maður í annarlegu ástandi og með hníf í hendi kom á leikskólann Hagaborg um fjögurleitið í dag, en hann huggðist sækja barn sambýliskonu sinnar.

Krefst þriggja ára fangelsisdóms

Saksóknari í málinu gegn Jónasi Garðarssyni, vegna strands skemmtibátsins Hörpunnar, fer fram á að Jónas verði dæmdur í þriggja ára óskilorðsbundið fangelsi. Bótakröfur sem settar hafa verið fram í málinu nema hátt í 20 milljónum króna.

Ekkert minnst á álverið í Straumsvík í stefnuskránni

Öllum börnum í Hafnarfirði sem náð hafa átján mánaða aldri verður tryggð leikskólavist á næsta kjörtímabili, ef markmið Samfylkingarinnar í bænum ná fram að ganga. Ekkert er minnst á framtíð álversins í Straumsvík í stefnuskrá flokksins fyrir næstu fjögur ár.

Skoðum landið sem hverfur

Náttúruverndarsinnar sem kalla sig Íslandsvini, eru að skipuleggja fjölbreytta tíu daga fjölskyldudagskrá við Snæfell seinni hluta júlí til að kynna fyrir Íslendingum og útlendingum landið sem hverfur undir Hálslón í haust.

Jónas við stýrið, segir sonur hans

Hljóðupptökur með frásögn ellefur ára gamals sonar Jónasar Garðarssonar, formanns Sjómannasambands Reykjavíkur, voru spilaðar fyrir Héraðsdómi um klukkan þrjú í dag. Drengurinn segist hafa verið sofandi þegar báturinn strandaði á Skarfaskeri en greindi frá því að faðir hans hefði verið við stýri þegar lagt var úr höfn og í stýrissæti þegar hann kom upp eftir að báturinn steytti á skerinu. Hann sagði einnig að hann vissi ekki til þess að annar en faðir hans hefði stýrt bátnum nokkurn tímann.

Fasteignamarkaðurinn að ná jafnvægi?

Samkvæmt upplýsingum frá Fasteignamati ríkisins var 32,5% samdráttur í fjölda þinglýstra kaupsamninga á höfuðborgarsvæðinu í apríl samanborið við mars. Samdráttur í veltu nemur 27,5% fyrir sama tímabil.

Sveitarfélagið Ölfuss dæmt til að greiða starfsmanni bætur

Sveitarfélagið Ölfus var í dag dæmt til að greiða karlmanni 2,2 milljónir króna vegna ólögmætrar uppsagnar. Maðurinn var ráðinn forsstöðumaður Egilsbúðar og bókasafns Þorlákshafnar árið 1998 en var sagt upp með vísan til skipulagsbreytinga árið 2003.