Lögregla fann snáka í Kópavogi

Tveir stórir snákar, skammbyssur og töluvert af hassi voru meðal þess sem lögreglan í Kópavogi fann við húsleit í bænum í nótt. Hún naut meðal annars aðstoðar sérsveitarmanna frá Ríkislögreglustjóra við aðgerðina.

Varað við fljúgandi hálku

Vegagerðin varar við að flughált er á Þverárfjalli, Lágheiði, Mývatnsöræfum og á Hellisheiði eystri. Hálkublettir eru á Hellisheiði og í Þrengslum auk fleiri staða á Suðurlandi, hálka í Bröttubrekku og á Holtavörðuheiði auk þess sem hálka og hálkublettir eru víða um allt norðanvert landið frá Vestfjörðum til Austurlands.

Dæmdur fyrir amfetamínframleiðslu

Héraðsdómur Reykjavíkur dæmdi í gær karlmann á fimmtugsaldri í 14 mánaða fangelsi fyrir að framleiða amfetamín í Kópavogi og fyrir fleiri brot, meðal annars fyrir að hóta fólki öllu illu og að ráðast á lækni fyrr á árinu.

Páll sveik öll loforð

Atli Eðvaldsson, þjálfari knattspyrnuliðs Þróttar, sendi frá sér yfirlýsingu í gær þar sem hann greinir frá sinni hlið mála í samskiptum við Pál Einarsson, fyrrverandi fyrirliða Þróttar. Yfirlýsingin er birt í heild sinni í Fréttablaðinu í dag. Páll og Atli gátu ekki starfað saman og lauk ágreiningi þeirra með því að Páll yfirgaf félagið.

Hagnaður ríkissjóðs alls 91 milljarður

Tekjur ríkissjóðs nema rúmlega 408 milljörðum króna þegar tölur í fjárlögum og fjáraukalögum eru lagðar saman. Gjöldin nema 317 milljörðum. Hagnaðurinn er því 91 milljarður króna. Þar spilar sala Landssímans stærsta hlutverkið.

Sigur fyrir réttarkerfið í landinu

"Þetta er ekki aðeins sigur fyrir mig heldur er þetta sigur fyrir réttarkerfið í landinu vegna þess að þetta er fordæmisgefandi dómur," segir Valgerður H. Bjarnadóttir. Hæstiréttur dæmdi í gær að íslenska ríkinu bæri að greiða Valgerði sex milljjónir króna í bætur fyrir að Árni Magnússon félagsmálaráðherra skyldi hafa lagt að henni að láta af störfum sem framkvæmdastjóri Jafnréttisstofu.

Krabbameinsleit stór þáttur í að draga úr leghálskrabbameini

Leghálskrabbameinsleit er stærsti þátturinn í að draga úr tíðni leghálskrabbameins. Bólusetning kvenna mun ekki koma í veg fyrir nauðsyn þess að konur mæti til leitar.

Dæmdur fyrir að meiða persónu og æru Valgerðar

Lögmaður Valgerðar H. Bjarnadóttur, fyrrverandi framkvæmdastjóra Jafnréttisstofu, segir ástæðu þess að Hæstiréttur snýr við dómi Héraðsdóms m. a. þá að ekki nóg með að vera dæmdur fyrir að misbeita valdi sínu, heldur sé félagsmálaráðherra einnig dæmdur fyrir að meiða persónu og æru Valgerðar. Það sé fordæmisskapandi og það sé frekar hlutverk Hæstaréttar en Héraðsdóms að skapa slíkt fordæmi.

Bíll lenti þversum á Blöndubrú innri

Lögreglan á Blönduósi vinnur nú að því að fjarlægja fólksbíl sem liggur þvert á Blöndubrú innri eftir að ökumaður missti stjórn á bíl sínum. Slysið átti sér stað um níu leytið í kvöld og var ungt par í bílnum og eru þau bæði ómeidd. Blöndubrú innri er í Blöndudal og að sögn lögreglu er flughálka á vegum þar. Um fólksbíl er að ræða og er hann mikið skemmdur en sem fyrr segir liggur bíllinn þversum á brúnni og lokar alveg fyrir umferð.

Allt að áttatíu vinnuslys á mánuði

Á milli sextíu og fimm og áttatíu vinnuslys verða við Kárahnjúka í hverjum mánuði. Í þriðjungi tilfella missa menn einn dag eða fleiri úr vinnu. Yfirlæknir vinnusvæðisins telur þessa slysatíðni eðlilega miðað við aðstæður.

Félagsmálaráðherra fagnar því að málinu sé lokið

Árni Magnússon félagsmálaráðherra segist, í tilefni dóms Hæstaréttar í dag þar sem íslenska ríkinu var gert að greiða Valgerði H. Bjarnadóttur sex milljónir króna í skaðabætur, fagna því að málinu sé lokið. Hann dragi þó ekki dul á að þessi niðurstaða Hæstaréttar valdi sér vonbrigðum. Í dóminum segir m.a. að félagsmálaráðherra hafi brotið meðalhófsregluna við starfslok Valgerðar sem framkvæmdastjóri Jafnréttisstofu.

Bæjarstjórinn í Hafnarfirði vill endurskoða kjarasamninga

Bæjarstjórinn í Hafnarfirði segir að launanefnd sveitarfélaganna þurfi að taka upp kjarasamninga sem gerðir voru síðasta vor. Hann segist ekki sætta sig við sem yfirmaður starfsmannamála Hafnarfjarðarbæjar að starfsfólk þar sé á mun lægri launum en starfsfólk Reykjavíkurborgar.

Frumvarpi frestað vegna bruna

Iðnaðarráðherra varð að draga frumvarp sitt til baka um rannsóknir og nýtingu á auðlindum í jörðu á þessu þingi, vegna málþófs stjórnarandstöðu. Rætt var um frumvarpið til klukkan tvö í nótt og átti að halda umræðunni áfram klukkan tíu í morgun, en falla varð frá því þegar eldur kviknaði í rafmagnstöflu Alþingis. Formaður Vinstri - grænna segir að orkuiðnaðurinn hafi gripið í taumana. Samkomulag hefur náðst á milli flokkanna um að þinginu ljúki síðdegis á morgun.

Taka að sér verkefnastjórn vegna flugvallarins í Kabúl

Íslenska friðargæslan mun taka að sér verkefnisstjórn við uppbyggingu flugvallarins í Kabúl í Afganistan, að ósk þarlendra stjórnvalda.

Aukin hætta á krónískum öndunarfærasjúkdómum

Aukin svifryksmengun hefur mikil áhrif á einstaklinga með öndunarfærasjúkdóma. En svifrykmengun í Reykjavík hefur tuttugu sinnum farið yfir heilsuverndarmörk á árinu.

Forstjóri KB banka segir ekkert hæft í ásökunum Íbúðalánasjóðs

Íbúðalánasjóð grunar að KB banki hafi brotið lög og góða viðskiptahætti þegar bankinn seldi íbúðabréf sama dag og síðasta útboð sjóðsins fór fram og hefur óskað eftir umsögn Fjármálaeftirlitsins. Forstjóri KB banka á Íslandi segir ekkert hæft í þessum ásökunum.

Slökkviliðið á útopnu vegna vatnsflóðs

Slökkvilið höfuðborgarsvæðisins hefur verið á útopnu út um allan bæ í dag vegna vatnsflóðs í kjallara húsa. Allir dælubílar slökkviliðsins hafa verið notaðir og hafa á stundum allir verið úti í einu. Á fimmta tímanum var kallaður út aukamannskapur eftir að aðalæð í holræaleiðslum á mótum Laufásvegar og Baldursgötu fór í sundur.

Félagsmálaráðherra braut meðalhófsregluna

Félagsmálaráðherra braut meðalhófsregluna við starfslok Valgerðar H. Bjarnadóttur, fyrrverandi framkvæmdastjóra Jafnréttisstofu. Hæstiréttur dæmdi henni 6 milljónir króna í bætur. Héraðsdómur Reykjavíkur hafði áður sýknað íslenska ríkið af kröfu Valgerðar.

5 stjörnu vegir á Íslandi

Fimm stjörnu bílar á fimm stjörnu vegum, er markmið Félags íslenskra bifreiðaeigenda sem í dag kynnti nýtt verkefni í samstarfi við Umferðarstofu og Samgönguráðuneyti þar sem gerðar eru ítarlegar öryggisúttektir á íslenskum vegum undir merkjum EuroRAP.

Getur vel séð fyrir sér að verslunarmannafélög sameinist öll

Formaður Verzlunarmannafélags Reykjavíkur getur vel séð fyrir sér að verslumannafélög landsins sameinist í eitt félag á næstu árum, en Reykjavíkurfélagið hefur nýverið gengið frá samkomulagi sem ljúka á með sameiningu við verslunarmannafélögin í Hafnarfirði og Vestmannaeyjum.

Flug liggur víða niðri

Hvassviðrið víða um land í dag hefur haft mikil áhrif á flugsamgöngur. Allt flug til og frá Vestmannaeyjum hefur legið niðri og sömu sögu er að segja með flug til og frá Ísafirði. Í Eyjum er óvíst hvenær hægt verður að fljúga aftur og að sögn starfsmanns Flugfélags Íslands á flugvellinum þar er útlitið slæmt alveg fram yfir helgi.

Grunaður um viðamikla fíkniefnasölu

Hæstiréttur hefur fellt úr gildi gæsluvarðhaldsúrskurð yfir karlmanni sem er grunaður um viðamikla fíkniefnasölu á Akureyri. Maðurinn var handtekinn á skemmtistað á Akureyri fyrir viku með peninga sem lögregla telur afrakstur fíkniefnasölu og heima hjá honum fannst eitt kíló af maríjúana.

Fá engar bætur fyrir förgun gæsa

Ríkissjóður var í dag sýknaður af fimm milljóna króna skaðabótakröfu hjóna sem var gert að farga aligæsum á búi sínu eftir að salmonella greindist í gæsunum. Dýralæknir fyrirskipaði förgunina og fóru hjónin að kröfu hans.

Bæta þarf kjör, aðbúnað og virðingu fyrir uppeldisstörfum

Rektor Kennaraháskóla Íslands segir að bæta þurfi kjör, aðbúnað og virðingu fyrir uppeldis- og umönnunarstörfum til að fjölga karlkynsnemendum við skólann. Vandinn verði ekki leystur með kynjakvóta einum og sér.

Gæsluvarðhald Albana framlengt

Hæstiréttur hefur framlengt gæsluvarðhaldsúrskurð fyrir albönskum manni sem grunaður er um manndráp í Grikklandi. Maðurinn var handtekinn við komu sína hingað undir lok september fyrir að ferðast með fölsk skilríki og hefur síðan setið í fangelsi, fyrst við afplánun fangadóms og síðan í gæsluvarðhaldi.

Baráttan um farþegana harðnar

Áætlunarferðum á milli Íslands og meginlandsins fjölgar verulega á næsta ári. SAS-Braathens, sem er norski armur SAS-samsteypunnar, tilkynnti í gærkvöldi að félagið ætlaði að hefja áætlunarflug á milli Óslóar og Keflavíkur í vetur og nýverið tilkynnti flugrisinn British Airways að félagið ætlaði að hefja áætlunarflug á milli Stansted á Englandi og Keflavíkur síðar í vetur.

Gera við breiðþotu í roki og rigningu

Hátt í 15 kanadískir flugvirkjar eru nú í roki og rigningu að skipta um hreyfil í kanadísku breiðþotunni, sem lenti með bilaðan hreyfil á Keflavíkurflugvelli á sunnudag. Þotan kemst ekki inn í þjónustuskýli Flugleiða á vellinum.

Miklar annir hjá slökkviliði

Miklar annir voru hjá Slökkvilið höfuðborgarsvæðisins milli átta og tíu í morgun og voru allir dælubílar úti í einu.

NSÍ mótmæla lagabreytingu um auðlindanýtingu

Náttúruverndarsamtök Íslands vilja að Alþingi úthluti áfram virkjanaleyfum en ekki lokaður hópur sérfræðinga og embættismanna eins og tillaga umhverfisráðherra til breytinga á lögum um rannsóknir og nýtingu á auðlindum í jörðu felur í sér.

Útúrsnúningur hjá ráðherra

Stefán Ólafsson, prófessor, svarar gagnrýni á skýrslu sína, Örorka og velferð á Íslandi, fullum hálsi. Hann segir rangt að hann hafi bara tiltekið tvo bótaflokka við útreikninga sína. Hann hafi beitt 8 ólíkum aðferðum við að sýna þróun kjara og í tveimur af þeim hafi hann bara tiltekið tvo bótaflokka til að sýna ákveðna þróun. Þá sé það útúrsnúningur að hann hafi misskilið aldurstengingu örorkubóta.

Saka launanefnd sveitarfélaga um láglaunastefnu

Tvö starfsmannafélög saka launanefnd sveitarfélaganna um að standa fyrir láglaunastefnu og mismunun sem sé ólíðandi. Munað getur allt að tíu til tólf launaflokkum á milli sveitarfélaga fyrir sambærileg störf.

Ekkert athugavert við viðskiptin

Stjórnendur KB-banka vísa því á bug að nokkurt hafi verið athugavert við viðsk þeirra sama dag og Íbúðalánasjóður efndi til síðasta útboðs síns. Stjórnarformaður Íbúðalánasjóðs telur KB-banka hafa tímasett útboðið til að hækka vexti Íbúðalánasjóðs.

Litlar efndir á rúmum átta árum

Hálfu níunda ári eftir að Alþingi samþykkti að efla bæri rannsóknir og sjómælingar innan 200 sjómílna efnahagslögsögunnar er enn ekki búið að veita krónu til verkefnisins.

Vilja áhættumat fyrir olíuflutninga

Bæjarstjórn Hafnarfjarðar vill að áhættugreining verði gerð vegna olíuflutning og hvetur samgönguyfirvöld til að hefjast handa við slíka vinnu. Mikið magn olíu fer um Hafnarfjörð í viku hverri og vilja bæjaryfirvöld að áhættugreining liggi fyrir svo hægt sé að skipuleggja viðbrögð ef eitthvað kemur upp á.

Eldur kom upp á Alþingi

Eldur kom upp í aðalrafmagnstöflu Alþingishússins á níunda tímanum í morgun en starfsmönnum tókst með snarræði að slökkva eldinn áður en slökkviliðið kom á vettvang.

Tvö keppa um efsta sætið

Sjö hafa tilkynnt framboð í forvali Vinstrihreyfingarinnar - græns framboðs á Akureyri en framboðsfrestur rennur út eftir viku. Forvalið sjálft fer svo fram laugardaginn 21. janúar. Tvö hafa gefið kost á sér í fyrsta sæti, þau Baldvin H. Sigurðsson og Valgerður H. Bjarnadóttir.

Yfir 400 í mjög brýnni þörf

402 eldri borgarar eru í mjög brýnni þörf eftir dvöl á hjúkrunarheimili og 53 í brýnni þörf. Þetta kemur fram í svari Jóns Kristjánssonar heilbrigðisráðherra við fyrirspurn Björgvins G. Sigurðssonar, þingmanns Samfylkingar.

Kostnaður orðinn 200 milljónir

Framboð Íslands við framboð til öryggisráðs Sameinuðu þjóðanna er kominn í 200 milljónir króna og á eftir að tvöfaldast áður en yfir lýkur að því er fram kemur í svari utanríkisráðherra við fyrirspurn Sigurjóns Þórðarsonar, þingmanns Frjálslynda flokksins.

Vilja loka á launanefnd sveitarfélaga

Stjórn og trúnaðarmannaráð Starfsmannafélags Hafnarfjarðar vill að bæjarstjórn afturkalli umboð launanefndar sveitarfélaga til að semja um kaup og kjör starfsmanna fyrir hönd bæjarins.

Samþykktu sameiningu við VR

Félagar í Verslunarmannafélagi Hafnarfjarðar hafa samþykkt sameiningu við Verzlunarmannafélag Reykjavíkur. 93 prósent félagsmanna samþykktu sameininguna sem verður til reynslu í eitt ár til að byrja með. Í kjölfarið verður svo metið hvort félögin skuli sameinast að fullu.

SAS hyggst fljúga milli Keflavíkur og Oslóar

SAS-Braathens, sem er norski armur SAS samsteypunnar, tilkynnti í gærkvöldi að félagið ætlaði að hefja áætlunarflug á milli Oslóar og Keflavíkur frá og með 26. mars og fljúga hingað þrisvar í viku.

Vill að Fjármálaeftirlitið kanni viðskipti KB banka

Íbúðalánasjóður hefur óskað eftir því að Fjármálaeftirlitið kanni hvort viðskipti KB banka með skuldabréf Íbúðalánasjóðs rétt fyrir lokun markaða hinn 22. nóvember síðastliðinn stangist á við ákvæði laga um verðbréfaviðskipti og samræmis góðum viðskiptaháttum.

Bankarnir tóku skellinn

Viðskiptabankar þeirra sem urðu fyrir því að stolið var úr heimabönkum þeirra bættu þeim að fullu þær fjárhæðir sem stolið var, samkvæmt upplýsingum Fréttablaðsins. Um samtals rúmar tvær milljónir króna er að ræða í fjórum málum sem lögreglan í Reykjavík hefur nú til rannsóknar.

Rauð jól í Reykjavík

Jólin verða rauð með hvítum flekkjum á höfuðborgarsvæðinu segir Sigurður Þ. Ragnarsson, jarð- og veðurfræðingur. Norðlendingar geta hins vegar átt von á hvítum jólum. Austan- og vestanlands verða jólin ekki snjóþung en gætu þó orðið hvít.

Millifærði þýfi inn á tvo einkareikninga

Maðurinn sem situr í gæsluvarðhaldi, grunaður um þjófnað úr heimabönkum fólks, millifærði þýfið inn á tvo reikninga sem eru í eigu hans. Lögreglan ber til baka fréttir þess efnis að umræddur maður sé aðeins milliliður í málinu.