Meiri fuglaveiðar í Reykjavík

Fjöldi fólks hefur tilkynnt veiðar á öndum, gæsaungum og jafnvel spörfuglum í Hljómskálagarði, Laugardal og Fossvogsdal í kjölfar frétta af andaveiðum í borginni. Ljóst er að fuglaveiðar í borginni eru mun umfangsmeiri en talið var.

Herferð gegn nauðgunum

V-Dagurinn, samtök gegn ofbeldi á konum, hafa hafið herferð gegn nauðgunum um Verslunarmannahelgina.

Elliðaár freyða

Froða á yfirborði Elliðaár vakti athygli manna og óttuðst sumir að jafnvel væri um mengun að ræða af völdum útrásar.

Slysahætta í Hallormsstað

Það er tímaspursmál þangað til alvarlegt slys verður á veginum í gegnum Hallormsstaðarskóg, en hraðakstur er viðvarandi vandamál þar. Samkvæmt þremur hraðakönnunum sem gerðar voru í júlí, aka aðeins 45 prósent ökumanna á löglegum hámrkshraða.

Breytti venju samkvæmt

Halldór Ásgrímsson, formaður Framsóknarflokksins og forsætisráðherra í fjarveru Davíðs Oddssonar, segir að hann hafi vænt þess að forsetinn staðfesti að fella lagafrumvarp um fjölmiðla úr gildi eins og venja sé til.

Átti von á staðfestingu forseta

Steingrímur J. Sigfússon, formaður Vinstri hreyfingarinnar - græns framboðs, segir að hann hafi frekar átt von á því að forsetinn staðfesti að fella lagafrumvarpið úr gildi miðað við þróun málsins.

Hvassviðri á Snæfellsnesi

Hvassviðri gerði óvænt á norðanverðu Snæfellsnesi í gærkvöldi og kallaði lögregla út björgunarsveitir til að hemja lausa hluti sem voru farnir að fjúka. Fellihýsi fauk meðal annars um koll á tjaldstæðinu í Stykkishólmi, flaggstöng brotnaði og lausamunir fuku um hafnarsvæðið í Ólafsvík.

Samstarf um loðnuleit í haust

Útgerðarmenn og Hafrannsóknastofnun hafa þegar ákveðið að hafa samstarf um loðnuleit í október, líkt og gert var nú í vor, en sumarvertíðinni lauk um helgina. Aðeins veiddust 44 þúsund tonn sem er helmingi minni afli en á sama tíma í fyrra.

Missti stjórn á kranabíl

Ökumaður 60 tonna kranabíls missti stjórn á bílnum þegar hann ók eftir Ólafsvíkurvegi, vestan við Borgarnes, í gærkvöldi og hafnaði bíllinn utan vegar. Þar er mýrlent og sökk kranabíllinn nokkuð í mýrina. Stór jarðýta og hjólaskófla voru flutt á vettvang til aðstoðar og náðist kraninn upp eftir mikla fyrirhöfn. Ökumann hans sakaði ekki.

Laxveiðimenn fagna rigningunni

Laxveiðimenn á suðvesturhorni landsins binda miklar vonir við vætutíðina sem nú er gengin í garð þar sem margar ár eru orðnar mjög vatnslitlar. Veiði hefur hins vegar verið allgóð þrátt fyrir það og í gær var t.d. búið að veiða 840 laxa í Norðurá. Blanda kemur verulega á óvart með 820 laxa og 550 löxum hefur verið landað úr Laxá í Kjós.</font />

Loftbyssa tekin af 11 ára dreng

Lögreglan í Keflavík tók loftbyssu af 11 ára gömlum dreng þar í bæ í gær þar sem hann var að skjóta út í loftið. Meðhöndlun slíkra gripa er stranglega bönnuð og þykir mildi að ekki hafi orðið slys á fólki.

Kókaín vinsælasta fíkniefnið

Kókaín er orðið lang vinsælasta fíkniefnið í Danmörku og nær nú til allra þjóðfélagshópa. Nákvæmlega sama þróun virðist vera upp á teningnum hér á landi þar sem dagsskammturinn kostar rösklega tíu þúsund krónur.

Skipum Hafró snúið til lands?

Rannsóknaskip Hafrannsóknastofnunar stöðvast í dag ef samninganefndir ríkisins og Sjómannafélags Reykjavíkur ná ekki samkomulagi á fundi sem nú stendur hjá Ríkissáttasemjara.

Bakslag verði húsið ekki rifið

Árni Jóhannesson, framkvæmdarstjóri byggingarfyrirtækisins sem á Austurbæjarbíó, segir ummæli forseta borgarstjórnar um að litlar líkur séu á að húsið verði rifið verulegt bakslag fyrir uppbyggingu á svæðinu. Árni segir málinu ekki lokið og fundar með borgaryfirvöldum í næstu viku.

Lögin komin í forsætisráðuneytið

Nýjustu fjölmiðlalögin, sem samþykkt voru á Alþingi á fimmtudag, bárust forsætisráðuneytinu laust fyrir hádegi og hafa því ekki borist forsetanum til undirritunar. Hann þarf að fá ný lög til staðfestingar innan hálfs mánaðar frá því að Alþingi samþykkir þau.

Samtök um frelsun Fischers stofnuð

Íslendingar vinna að stofnun alþjóðlegrar hreyfingar um frelsun Bobbys Fischers. Hrafn Jökulsson, einn forsvarsmannanna, segir að fyrst hægt hafi verið að stofna hreyfingu um frelsun roskins háhyrnings, þá hljóti það sama að vera hægt um roskinn skáksnilling. 

Leit hefst að nýju í dag

Leit verður væntanlega hafin að nýju í dag að Sri Rhamawati sem saknað hefur verið í rúmar þrjár vikur. Að sögn lögreglunnar verður leitað á og í grennd við höfuðborgarsvæðið. Fyrrverandi sambýlismaður Sri hefur setið í gæsluvarðhaldi í tæpar þrjár vikur en hann er grunaður um aðild að hvarfi hennar.

Íslendingar með mikið keppnisskap

Íslendingar eru í hópi þeirra Evrópuþjóða sem hafa hvað mest keppnisskap. Þetta kemur fram í könnun sem Visa Europe lét gera nýlega í átta ríkjum álfunnar í tilefni Ólympíuleikanna sem haldnir verða í Aþenu í næsta mánuði. Könnunin var framkvæmd af Gallup og var hringt í tæplega 1800 manna slembiúrtak úr þjóðskrá.

Stjórnmálasamband við Sambíu

Ísland og Sambía hafa undirritað viljayfirlýsingu um stofnun stjórnmálasambands milli ríkjanna. Hjálmar W. Hannesson, fastafulltrúi Íslands hjá Sameinuðu þjóðunum, undirritaði yfirlýsinguna fyrir Íslands hönd í New York sl. föstudag.

SS hækkar nautakjötsverð

Sláturfélag Suðurlands hefur nú hækkað verð á nautgripakjöti til bænda um 6%. Eftir þessar verðbreytingar greiðir SS nú hæsta verð á landinu fyrir lang flesta flokka nautgripakjöts að því er segir í tilkynningu frá fyrirtækinu. 

Fyrrverandi skólastjóri sýknaður

Fyrrverandi skólastjóri Rafiðnaðarskólans, Jón Árni Rúnarsson, var í dag sýknaður í Héraðsdómi Reykjavíkur af ákæru um að hafa dregið sér tæplega 29 milljónir króna á sjö ára tímabili í starfi sínu hjá skólanum. Hann var hins vegar dæmdur í þriggja mánaða skilorðsbundið fangelsi  fyrir skjalafals og fjársvik.

Sjómannafélagið skrifaði undir

Boðuðu verkfalli háseta á skipum Hafrannsóknarstofnunar var aflýst síðdegis þegar samningar tókust milli fjármálaráðuneytisins og Sjómannafélags Reykjavíkur. Vegna hugmynda um skerðingu eða niðurfellingu sjómannaafsláttar geta hásetarnir sagt samningnum upp eftir tvö ár.</font />

Erlendir þingmenn í hvalaskoðun

Hér á landi eru staddir sex þingmenn frá Bretlandi og Þýskalandi á vegum Alþjóða dýraverndunarsjóðsins, IFAW, til að kynna sér málefni hvalveiða og hvalaskoðunar.

Líðan forsætisráðherra góð

Líðan Davíðs Oddssonar forsætisráðherra er eftir atvikum góð og framfarir hans eðlilegar, samkvæmt upplýsingum frá forsætisráðuneytinu. </font /></b />

Eigandi Austurbæjar ósáttur

Formaður skipulags- og byggingarnefndar segir minni líkur nú en áður að niðurrif Austurbæjar verði heimilað. Viðbrögð við grenndarkynningu ráði þar einna mestu. Eigandi hússins segist ósáttur, verði niðurrif ekki leyft. Hugsar næsta leik.

Bók Ómars uppseld

Bók Ómars Ragnarssonar, <em>Kárahnjúkar - með og á móti</em>, rýkur út og er nánast alltaf biðröð út á götu þegar Ómar áritar bókina að því er segir á heimasíðu JPV-útgáfu sem gefur bókina út. Bókin kom út á miðvikudag og seldist hún upp á svipstundu. Hún er væntanleg aftur í búðir síðar í þessari viku.

Sri ófundin - maðurinn þegir enn

Leit lögreglunnar að Sri Rhamawati hefur engum árangri skilað, né heldur yfirheyrslur yfir manninum sem grunaður er um að vera valdur að hvarfi hennar. Lögregla segir yfirheyrslur fara fram þegar aðstæður gefi tilefni til. Maðurinn, sem setið hefur í gæsluvarðhaldsvist á Litla Hrauni frá 6. júlí, var síðast yfirheyrður á laugardag.

Nánast engar umbætur í brunavörnum

Ekkert hefur verið gert í brunavörnum á tveimur þriðju hluta gistiheimila sem voru með ófullnægjandi brunavarnir í fyrra. Lagfæringar hafa verið gerðar á fimm gistiheimilum af fimmtán en ekkert þeirra er þó með viðunandi brunavarnir að öllu leyti.

ÁTVR brýtur áfengislög

Áfengis- og tóbaksverslun ríkisins brýtur gegn áfengislögum með því að auglýsa áfengi. Forstjóri ÁTVR segir stofnunina ekki ganga eins langt og heildsalar en tekur undir með þeim að skýrari reglur vanti um áfengisauglýsingar hér á landi.

Fyrrverandi skólastjóri sýknaður

Fyrrverandi skólastjóri Rafiðnaðarskóla Íslands var í dag sýknaður í Héraðsdómi Reykjavíkur af því að hafa svikið tæplega 29 milljónir króna frá skólanum. Hann var hins vegar dæmdur í þriggja mánaða skilorðsbundið fangelsi fyrir að hafa dregið sér 450 þúsund krónur frá Viðskipta- og tölvuskólanum.

Boðaður í skýrslutöku

Jón Gerald Sullenberger hefur verið boðaður í skýrslutöku fyrir héraðsdómi Reykjavíkur á morgun. Skýrslutakan er vegna lögreglurannsóknar á forsvarsmönnum Baugs að því er fram kom í fréttum Útvarpsins.

Starfsfólk fæst ekki

Mikið álag er á starfsfólki slysa- og bráðadeildar Landspítala háskólasjúkrahúss og fólk getur þurft að bíða klukkustundum saman eftir þjónustu. Starfandi lækningaforstjóri segir ástæðuna ekki vera fjársvelti heldur fáist fólk einfaldlega ekki til starfa. 

Frelsum Bobby

„Frelsum Bobby“ samtökin verða stofnuð hér á landi til að freista þess að frelsa Bobby Fischer úr varðhaldi í Japan og búa honum áhyggjulaust ævikvöld á Íslandi. Á morgun verður sett upp vefsíða undir nafninu „Free Bobby“ og er markmiðið að ná þannig til heimsbyggðarinnar allrar.

Tíundi hver fangi er útlendingur

Erlendur föngum hefur fjölgað mikið í íslenskum fangelsum síðustu ár. Sjö erlendir fangar voru í eða luku afplánun árið 2000 en voru þrjátíu árið 2003. Georg Lárusson hjá Útlendingastofnun segir tölurnar vera í samræmi við þróun útlendingamála á Íslandi.

Leita Sri í dag

Slysavarnarfélagið Landsbjörg mun leita að Sri Rahmawati á svæðum í nágrenni Reykjavíkur ásamt lögreglu í dag, að sögn Ómars Smára Ármannssonar hjá lögreglunni í Reykjavík.

Tvenn jarðgöng og nýir vegir

Unnið er að umfangsmiklum vega- og gatnaframkvæmdum víða um land í sumar. Ekki má gleyma jarðgöngunum, en boranir og sprengingar eru í fullum gangi við tvenn göng. Fjármagn til nýframkvæmda af þessu tagi nemur 7,2 milljörðum á árinu.

Tölvur spá vætu suðvestanlands

Samkvæmt tölvuspám, einkum frá Danmörku og Bretlandi, er gert ráð fyrir vætusömu veðri sunnan- og vestanlands um verslunarmannahelgina. Norðlendingar og Austfirðingar fái hins vegar blíðuna.

Lést í eldsvoða í Reykjavík

Kona á níræðisaldri lést í eldsvoða í fjölbýlishúsi við Sundlaugaveg í Reykjavík í nótt. Það var um sexleytið í nótt sem vegfarandi sá reyk leggja út frá húsinu og hringdi strax í neyðarlínuna. Í húsinu eru fjórar íbúðir og var konan ein á efri hæð þess.

Fimm slösuðust í bílveltu

Fimm manns slösuðust, þar af einn lífshættulega, eftir að bíll fór út af veginum og valt við Vatnsskarðsnámur á veginum til Krýsuvíkur á tíunda tímanum í gærkvöld. Krýsuvíkurvegi var lokað á kafla um tíma vegna slyssins.

Björgunarsveit náði í Dana

Flugbjörgunarsveitin á Hellu sótti í nótt danskan ferðamann um fertugt sem hafði læstst í baki, um hálfan annan kílómetra frá Hrafntinnuskeri. Beiðni barst á ellefta tímanum í gærkvöld um að sækja manninn en hann hafði þá hringt í Neyðarlínuna.

Hellisheiðin annar vart álaginu

Mikil og þétt umferð hefur verið um Hellisheiðina í sumar og nú er svo komið að vegakerfið annar vart álaginu. Ólafur Helgi Kjartansson, sýslumaður á Selfossi, segir umhugsunarvert hvort leyfa eigi ýmiss konar áheitaferðir um veginn þar sem sýnt sé að umferðarþunginn er mjög mikill flesta daga.

Ókeypis úttekt á eftirvögnum

Vátryggingafélag Íslands og Frumherji bjóða næstu daga ókeypis úttekt á eftirvögnum (fellihýsum, hjólhýsum tjaldvögnum og hestakerrum) til að fólk geti gengið úr skugga um að allur búnaður sé löglegur og í lagi áður en lagt er upp í ferðalag um verslunarmannahelgina.

Viðbúnaður í Vestmannaeyjum

Viðbúnaður var á Vestmannaeyjaflugvelli á sjöunda tímanum í gærkvöldi þegar flugvél Flugfélags Vestmannaeyja kom inn til lendingar eftir að ljós hafði sýnt að ekki voru öll hjól læst. Slökkvilið flugvallarins og Vestmannaeyjabæjar var í viðbragðsstöðu og á meðan reyndi flugmaðurinn að setja hjólin niður og upp aftur nokkrum sinnum.

Lýst eftir manni

Lögreglan á Selfossi lýsir eftir Hákoni Svani Hákonarsyni, sem hvarf af hjólhýsasvæðinu á Laugarvatni um níuleytið í gærkvöld og ekki hefur spurst til síðan. Björgunarsveitir leita hans en hafi einhver upplýsingar um ferðir hans frá því í gærkvöld eru þeir beðnir að láta lögregluna vita í síma 4801010.

Ökumaðurinn grunaður um ölvun

Ökumaður bíls, sem valt í Vatnsskarði á veginum til Krýsuvíkur í gærkvöld, er grunaður um ölvun. Fimm slösuðust, þar af einn lífshættulega, en hann slöngvaðist út úr bílnum. Mennirnir eru útlendingar en hafa verið búsettir hér á landi vegna starfa sinna.