Snákar og byssur fundust í Kópavogi

Tveir snákar, skammbyssur og töluvert af hassi var meðal þess sem lögreglan í Kópavogi fann við húsleit í bænum í nótt. Snákarnir eru yfir hálfur metri á lengd hvor, en blátt bann liggur við innflutningi þessháttar dýra bæði vegna þess að bit þeirra geta reynst hættuleg og svo geta þau borið með sér sjúkdóma, enda fara þau ekki í sóttkví, ef þeim er smyglað.

Spenna um framtíðarsýn Símans

Eitt stærsta viðskiptaleyndarmálið þessa dagana er, í hverju síminn ætlar að fjárfesta eftir að hann eykur hlutafé sitt um 35 milljarða króna, eins og allt stefnir í.

Hlýtur að hugleiða að segja af sér

Árni Magnússon hlýtur að hugleiða að segja af sér vegna dóms sem féll gegn honum í Hæstarétti í gær, sagði Steingrímur J. Sigfússon, formaður Vinstri hreyfingarinnar, græns framboðs. Árni Magnússon, félagsmálaráðherra, neitar að tjá sig frekar um málið og vísar til yfirlýsingar sem hann sendi frá sér í gær.

Slapp ómeidd úr bílveltu

Kona slapp óslösuð þegar bíll sem hún ók valt í hálku á Eyrarbakkavegi laust fyrir klukkan átta í morgun. Hálka er á nokkrum stöðum á Suðurlandi en að sögn lögreglu er útlit fyrir að hálkublettirnir hverfi þegar líður á daginn.

Kristinn fær engin svör

Kristinn H. Gunnarsson, þingmaður Framsóknarflokks, fær ekkert svar við fyrirspurn sinni um íbúðalán banka og sparisjóða. Hann spurði meðal annars hversu mikið hver banki og sparisjóður hefði lánað gegn veði í húsnæði, hversu margir væru í viðskiptum hjá hverjum bankanna í sig og á hvaða kjörum þeir væru.

Gary Glitter segist saklaus

Fyrrum poppstjarnan Gary Glitter hefur viðurkennt fyrir Víetnömskum yfirvöldum að hafa haft ellefu ára gamla stúlku í rúmi sínu en neitar að hafa misnotað hana. Hinum sextíu og eins árs gamla Glitter er haldið í fangelsi fyrir utan strandborgina Vung Tau, ásakaður um svívirðilegt athæfi með barni en hann er talinn hafa haft kynmök með allnokkrum stúlkum undir lögaldri, þar á meðal er ein ellefu ára og önnur tólf.

Bjarni Hafþór ráðinn til KEA

Bjarni Hafþór Helgason hefur verið ráðinn fjárfestingastjóri KEA og hefur hann störf um áramót. Hann mun annast framkvæmdastjórn fjárfestingafélaganna Hildings og Upphafs en þau eru dótturfélög KEA.

Verður líklega fyrsti kvenkyns forseti Chile

Michele Bachelet verður fyrsti kvenkyns forseti Chile, nái hún kjöri í í forsetakosningum á sunnudag. Til að ná kjöri verður forseti að hafa yfir 51 % atkvæða en Bachelet hefur forystuna í skoðanakönnunum með 48% atkvæða.

Tveir á sjúkrahús með reykeitrun

Eldur kviknaði í einu Bláu húsanna svokölluðu við Faxafen í Reykjavík fyrir um klukkustund síðan og var tvennt flutt á slysadeild vegna gruns um að það væri með reykeitrun.

Bíll skorðaðist þversum á Blöndubrú

Það var lán í óláni þegar ungur maður missti stjórn á bíl sínum á leið yfir brúna yfir Blöndu í Blöndudal í gærkvöldi að bíllinn skorðaðist þversum á brúnni á milli handriðanna í stað þess að fara út af öðru hvoru megin.

Viðurkenna að Rauði krossinn fái ekki aðgang að öllum föngum

Rauði krossinn fær ekki aðgang að öllum föngum sem Bandaríkjamenn hafa í haldi. Þetta viðurkenndu stjórnvöld í Washington í fyrsta skipti í gær.

Hreindýrum fjölgar ört á Grænlandi

Hreindýr í Grænlandi hafa aldrei verið fleiri en nú og ef fram fer sem horfir getur það haft alvarlegar afleiðingar fyrir bæði dýr og menn. Politiken greinir frá því að samkvæmt nýjustu talningu Náttúrfræðistofnunar Grænlands hafi hreindýrum í landinu fjölgað um fjórðung á síðustu fimm árum og telur hreindýrastofninn nú um 125 þúsund dýr.

Hellisheiði eystri lokað vegna hálku

Hellisheiði eystri hefur verið lokað fyrir umferð en þar er flughált. Vegagerðin varar einnig við flughálku á Nesjavallavegi, á Ströndum norðan Bjarnarfjarðar, á Þverárfjallsvegi, Lágheiði, Mývatnsöræfum og á Öxi.

Verslunum lokað í Kasmír í mótmælaskyni við skopmyndir

Fleiri þúsundum búða og verslana var lokað í gær í indverska hluta Kasmír í mótsmælaskyni við skopmyndir af Múhameð spámanni sem birtust í Jótlands-Póstinum fyrir rúmum tveimur mánuðum. Frá þessu greina fjölmiðlar á svæðinu.

Fimmtán fá ríkisborgararétt

Fimmtán fá ríkisborgararétt með lögum frá Alþingi áður en þingi verður frestað fram yfir jól samkvæmt tillögu allsherjarnefndar Alþingis. 21 sótti um að fá ríkisborgararétt, orðið var við beiðni fimmtán en sex hafnað.

Samþykktu samning við gæsluna

Kjarasamningur skipstjórnarmanna hjá Landhelgisgæslu Íslands var samþykktur með áttatíu og einu prósentu atkvæða. Tuttugu og einn félagi í Félagi skipstjórnarmanna hafði atkvæðisrétt og greiddu allir nema einn atkvæði.

Sjúkraliðar samþykkja kjarasamning

Sjúkraliðar í Reykjavík hafa samþykkt nýgerðan kjarasamning Sjúkraliðafélags Íslands og Reykjavíkurborgar. 28 af 57 á kjörskrá greiddu atkvæði. 27 þeirra greiddu atkvæði með samningnum en einn á móti.

Tveir saksóknarar boðaðir í réttarsal

Baugsmálið verður tekið fyrir í Héraðsdómi Reykjavíkur síðdegis í dag og hafa hvort tveggja Bogi Nilsson ríkissaksóknari og Sigurður Tómas Magnússon settur saksóknari verið boðaðir í þinghaldið.

Lögregla fann snáka í Kópavogi

Tveir stórir snákar, skammbyssur og töluvert af hassi voru meðal þess sem lögreglan í Kópavogi fann við húsleit í bænum í nótt. Hún naut meðal annars aðstoðar sérsveitarmanna frá Ríkislögreglustjóra við aðgerðina.

Drengur í bíl fórst í flugslysi

Sex ára gamall drengur lést þegar flugvél rann út af flugbraut á Midway-flugvellinum í Chicago í gærkvöld og út á götu. Vélin, sem er af gerðinni Boeing 737 og var notuð í innanlandsflugi, var í lendingu þegar slysið var.

Segir mann ekki hafa sagst vera með sprengju

Maðurinn sem var skotinn til bana í flugvél í Miami í fyrradag hrópaði ekki yfir vélina að hann væri með sprengju á sér. Þetta fullyrðir einn farþegi vélarinnar í viðtali við tímaritið Time. Farþeginn segir að lögreglumennirnir hafi verið allt of fljótir að grípa til þess ráðs að skjóta manninn, enda hafi hann verið á leiðinni út úr vélinni og aldrei notað orðið sprengja.

Varað við fljúgandi hálku

Vegagerðin varar við að flughált er á Þverárfjalli, Lágheiði, Mývatnsöræfum og á Hellisheiði eystri. Hálkublettir eru á Hellisheiði og í Þrengslum auk fleiri staða á Suðurlandi, hálka í Bröttubrekku og á Holtavörðuheiði auk þess sem hálka og hálkublettir eru víða um allt norðanvert landið frá Vestfjörðum til Austurlands.

Dæmdur fyrir amfetamínframleiðslu

Héraðsdómur Reykjavíkur dæmdi í gær karlmann á fimmtugsaldri í 14 mánaða fangelsi fyrir að framleiða amfetamín í Kópavogi og fyrir fleiri brot, meðal annars fyrir að hóta fólki öllu illu og að ráðast á lækni fyrr á árinu.

Páll sveik öll loforð

Atli Eðvaldsson, þjálfari knattspyrnuliðs Þróttar, sendi frá sér yfirlýsingu í gær þar sem hann greinir frá sinni hlið mála í samskiptum við Pál Einarsson, fyrrverandi fyrirliða Þróttar. Yfirlýsingin er birt í heild sinni í Fréttablaðinu í dag. Páll og Atli gátu ekki starfað saman og lauk ágreiningi þeirra með því að Páll yfirgaf félagið.

Lést af völdum fuglaflensu í Taílandi

Taílenskur drengur lést af völdum fuglaflensu í vikunni. Banamein piltsins var staðfest í nótt og þar með hafa fjórtán manns látist af völdum fuglaflensu í Taílandi. Alls hafa nú sjötíu manns látist úr flensunni í Asíu allri.

Segja forsvarsmenn Merck hafa vitað af aukaverkunum Vioox

Virt læknatímarit heldur því fram að lyfjaframleiðandinn Merck hafi vitað af hliðarverkunum gigtarlyfsins Vioxx árið 2000, en ekki afhent upplýsingarnar. Lyfið var ekki tekið af markaði fyrr en í fyrra , þegar ljóst þótti að það tvöfaldaði líkur á hjartaáfalli hjá þeim sem það hefðu tekið í meira en eitt og hálft ár.

Hagnaður ríkissjóðs alls 91 milljarður

Tekjur ríkissjóðs nema rúmlega 408 milljörðum króna þegar tölur í fjárlögum og fjáraukalögum eru lagðar saman. Gjöldin nema 317 milljörðum. Hagnaðurinn er því 91 milljarður króna. Þar spilar sala Landssímans stærsta hlutverkið.

Stökk um borð í rútu með sprengju

Að minnsta kosti þrjátíu létust og fjörutíu slösuðust í sjálfsmorðsárás í Bagdad í gær. Japanar hafa ákveðið að framlengja dvöl herliðs síns í Írak um eitt ár. Árásin var gerð á umferðarmiðstöð í Bagdad en sjálfsmorðsárásarmaðurinn stökk þá um borð í rútu sem var í þann mund að leggja af stað til sjíabæjarins Nasiriyah í suðausturhluta landsins.

Sigur fyrir réttarkerfið í landinu

"Þetta er ekki aðeins sigur fyrir mig heldur er þetta sigur fyrir réttarkerfið í landinu vegna þess að þetta er fordæmisgefandi dómur," segir Valgerður H. Bjarnadóttir. Hæstiréttur dæmdi í gær að íslenska ríkinu bæri að greiða Valgerði sex milljjónir króna í bætur fyrir að Árni Magnússon félagsmálaráðherra skyldi hafa lagt að henni að láta af störfum sem framkvæmdastjóri Jafnréttisstofu.

Slíkur framburður ótækur

Sérstakur dómstóll breskra lávarða úrskurðaði í gær að vitnisburð sem fengist hefði með pyntingum væri ekki hægt að nota gegn grunuðum hryðjuverkamönnum. Úrskurðurinn þýðir að taka verður upp mál átta manna sem sitja í öryggisgæslu og á senn að reka úr landinu á grundvelli framburðar fanga úr Guantanamo-búðunum alræmdu.

74 verkamenn eru taldir af

Talið er að í það minnsta 74 námaverkamenn hafi beðið bana þegar sprenging varð í fyrradag í kolanámu í Hebel-héraði, skammt frá Peking. Þetta er þriðja mannskæða námuslysið í Kína á hálfum mánuði.

Krabbameinsleit stór þáttur í að draga úr leghálskrabbameini

Leghálskrabbameinsleit er stærsti þátturinn í að draga úr tíðni leghálskrabbameins. Bólusetning kvenna mun ekki koma í veg fyrir nauðsyn þess að konur mæti til leitar.

Dæmdur fyrir að meiða persónu og æru Valgerðar

Lögmaður Valgerðar H. Bjarnadóttur, fyrrverandi framkvæmdastjóra Jafnréttisstofu, segir ástæðu þess að Hæstiréttur snýr við dómi Héraðsdóms m. a. þá að ekki nóg með að vera dæmdur fyrir að misbeita valdi sínu, heldur sé félagsmálaráðherra einnig dæmdur fyrir að meiða persónu og æru Valgerðar. Það sé fordæmisskapandi og það sé frekar hlutverk Hæstaréttar en Héraðsdóms að skapa slíkt fordæmi.

Bíll lenti þversum á Blöndubrú innri

Lögreglan á Blönduósi vinnur nú að því að fjarlægja fólksbíl sem liggur þvert á Blöndubrú innri eftir að ökumaður missti stjórn á bíl sínum. Slysið átti sér stað um níu leytið í kvöld og var ungt par í bílnum og eru þau bæði ómeidd. Blöndubrú innri er í Blöndudal og að sögn lögreglu er flughálka á vegum þar. Um fólksbíl er að ræða og er hann mikið skemmdur en sem fyrr segir liggur bíllinn þversum á brúnni og lokar alveg fyrir umferð.

Allt að áttatíu vinnuslys á mánuði

Á milli sextíu og fimm og áttatíu vinnuslys verða við Kárahnjúka í hverjum mánuði. Í þriðjungi tilfella missa menn einn dag eða fleiri úr vinnu. Yfirlæknir vinnusvæðisins telur þessa slysatíðni eðlilega miðað við aðstæður.

Félagsmálaráðherra fagnar því að málinu sé lokið

Árni Magnússon félagsmálaráðherra segist, í tilefni dóms Hæstaréttar í dag þar sem íslenska ríkinu var gert að greiða Valgerði H. Bjarnadóttur sex milljónir króna í skaðabætur, fagna því að málinu sé lokið. Hann dragi þó ekki dul á að þessi niðurstaða Hæstaréttar valdi sér vonbrigðum. Í dóminum segir m.a. að félagsmálaráðherra hafi brotið meðalhófsregluna við starfslok Valgerðar sem framkvæmdastjóri Jafnréttisstofu.

Bæjarstjórinn í Hafnarfirði vill endurskoða kjarasamninga

Bæjarstjórinn í Hafnarfirði segir að launanefnd sveitarfélaganna þurfi að taka upp kjarasamninga sem gerðir voru síðasta vor. Hann segist ekki sætta sig við sem yfirmaður starfsmannamála Hafnarfjarðarbæjar að starfsfólk þar sé á mun lægri launum en starfsfólk Reykjavíkurborgar.

Frumvarpi frestað vegna bruna

Iðnaðarráðherra varð að draga frumvarp sitt til baka um rannsóknir og nýtingu á auðlindum í jörðu á þessu þingi, vegna málþófs stjórnarandstöðu. Rætt var um frumvarpið til klukkan tvö í nótt og átti að halda umræðunni áfram klukkan tíu í morgun, en falla varð frá því þegar eldur kviknaði í rafmagnstöflu Alþingis. Formaður Vinstri - grænna segir að orkuiðnaðurinn hafi gripið í taumana. Samkomulag hefur náðst á milli flokkanna um að þinginu ljúki síðdegis á morgun.

Taka að sér verkefnastjórn vegna flugvallarins í Kabúl

Íslenska friðargæslan mun taka að sér verkefnisstjórn við uppbyggingu flugvallarins í Kabúl í Afganistan, að ósk þarlendra stjórnvalda.

Aukin hætta á krónískum öndunarfærasjúkdómum

Aukin svifryksmengun hefur mikil áhrif á einstaklinga með öndunarfærasjúkdóma. En svifrykmengun í Reykjavík hefur tuttugu sinnum farið yfir heilsuverndarmörk á árinu.

Forstjóri KB banka segir ekkert hæft í ásökunum Íbúðalánasjóðs

Íbúðalánasjóð grunar að KB banki hafi brotið lög og góða viðskiptahætti þegar bankinn seldi íbúðabréf sama dag og síðasta útboð sjóðsins fór fram og hefur óskað eftir umsögn Fjármálaeftirlitsins. Forstjóri KB banka á Íslandi segir ekkert hæft í þessum ásökunum.

Slökkviliðið á útopnu vegna vatnsflóðs

Slökkvilið höfuðborgarsvæðisins hefur verið á útopnu út um allan bæ í dag vegna vatnsflóðs í kjallara húsa. Allir dælubílar slökkviliðsins hafa verið notaðir og hafa á stundum allir verið úti í einu. Á fimmta tímanum var kallaður út aukamannskapur eftir að aðalæð í holræaleiðslum á mótum Laufásvegar og Baldursgötu fór í sundur.

Félagsmálaráðherra braut meðalhófsregluna

Félagsmálaráðherra braut meðalhófsregluna við starfslok Valgerðar H. Bjarnadóttur, fyrrverandi framkvæmdastjóra Jafnréttisstofu. Hæstiréttur dæmdi henni 6 milljónir króna í bætur. Héraðsdómur Reykjavíkur hafði áður sýknað íslenska ríkið af kröfu Valgerðar.

5 stjörnu vegir á Íslandi

Fimm stjörnu bílar á fimm stjörnu vegum, er markmið Félags íslenskra bifreiðaeigenda sem í dag kynnti nýtt verkefni í samstarfi við Umferðarstofu og Samgönguráðuneyti þar sem gerðar eru ítarlegar öryggisúttektir á íslenskum vegum undir merkjum EuroRAP.

Getur vel séð fyrir sér að verslunarmannafélög sameinist öll

Formaður Verzlunarmannafélags Reykjavíkur getur vel séð fyrir sér að verslumannafélög landsins sameinist í eitt félag á næstu árum, en Reykjavíkurfélagið hefur nýverið gengið frá samkomulagi sem ljúka á með sameiningu við verslunarmannafélögin í Hafnarfirði og Vestmannaeyjum.