Braust inn í Kjarvalsstaði

Lögreglumenn handtóku innbrotsþjóf á vettvangi í gærkvöldi eftir að hann hafði brotist inn í Kjarvalsstaði. Ólíklegt er talið að hann hafi haft listaverkaþjófnað í huga heldur hafi hann frekar verið að leita að peningum eða smáhlutum til að koma í verð því hann hafði rótaði í hirslum á skrifstofunni þegar lögregumenn komu að honum.

Dráttarbíll valt vegna vindhviðu

Stór dráttarbíll með tengivagn valt í mikilli vindhviðu þegar bíllinn, sem var á austurleið, átti skammt ófarið að Kirkjubæjarklaustri um klukkan sex í morgun. Ökumanninn sakaði ekki en bíllinn liggur á hliðinni á þjóðveginum og er hann lokaður. Vagninn, sem var tómur, hafnaði utan vegar.

Ók niður ljósastaura

Sautján ára unglingur, sem er nýkominn með bílpróf, missti stjórn á jeppa sínum þegar hann ók yfir hraðahindrun á Selfossi seint í gærkvöldi með þeim afleiðingum að hann ók niður tvo ljósastaura áður en bíllinn nam staðar.

Fimm Palestínumenn drepnir

Ísraelskar hersveitir skutu fimm palestínska hryðjuverkamenn til bana í morgun. Tveir þeirra voru Hamas-liðar sem tekist hafði að komast yfir mörk Gasa-strandarinnar og yfir til Ísraels.

Steinar féllu á veginn

Tveir stórir steinar, allt að hálfu tonni hvor, féllu úr fjallshlíð fyrir ofan þjóðveginn austan við Höfn, á móts við bæinn Þorgeirsstaði, í gærkvöldi. Svo vel vildi til að engin var á ferð um veginn þegar þeir féllu og með lagni komust ökumenn fram hjá þeim.

Pútín styður Bush

Vladímír Pútín, forseti Rússlands, styður George Bush í baráttunni um forsetaembættið í Bandaríkjunum. Pútín sagði í viðtali við þarlenda fjölmiðla í morgun að árásir hryðjuverkamanna í Írak væru verk alþjóðlegra samtaka sem vonuðu að árásirnar kæmu í veg fyrir að Bush yrði endurkjörinn.

Hryðjuverkamenn voru á eiturlyfjum

Hryðjuverkamennirnir í Beslan voru á eiturlyfjum og í umsátrinu um skólann þar voru margir þeirra í fráhvarfi, eftir því sem rússnesk yfirvöld fullyrða. 

Olíulinda leitað við Ísland

Búist er við auknum áhuga olíufélaga á að leita að olíulindum í grennd við Ísland og víðar á norðurslóðum vegna hækkandi olíuverðs og ótryggs ástands á mörgum helstu olíuvinnslusvæðunum.

Björgunarsveitir kallaðar út

Björgunarsveitir hafa verið kallaðar út til að aðstoða fólk sem lent hefur í vandræðum í bílum sínum vegna ófærðar og illviðris sem gengur nú yfir norðaustanvert landið. Mjög hvasst er einnig í vindhviðum vestur eftir Suðurströndinni.

Fleiri hross flutt út

Fleiri hross flutt út

Útflutningur á hrossum hefur aukist á milli ára, samkvæmt tölum frá Bændasamtökum Íslands. Nú hafa um eitt hundrað fleiri hross farið utan heldur en á sama tíma í fyrra, að sögn Hallveigar Fróðadóttur hjá BÍ. "Það hefur verið nóg að gera og ekkert lát ennþá," sagði hún.

Jónas neitar allri sök

Einn sakborninga í líkfundarmálinu neitar allri sök. Hinum sakborningunum tveimur ber að mestu leyti saman um að allir þrír hafi átt þátt í að koma líki Vaidasar Júsevicsíusar fyrir í höfninni í Neskaupstað. Aðalmeðferð málsins hófst í morgun fyrir Héraðsdómi Reykjavíkur.

Viðvaranir á bjórumbúðum

Stærsti bjórframleiðandi á Bretlandseyjum, Scottish og Newcastle sem meðal annars framleiðir Fosters-bjórinn, ætlar framvegis að setja viðvaranir á bjórflöskur sínar og -dósir líkt og þær sem nú eru settar á sígarettupakka.

Hærri skattur á áfengi

Heilbrigðis- og félagsmálaráðherrar Norðurlandanna samþykktu á fundi sínum um áfengismál í morgun að leggja til aukna skattlagningu á áfengi. Jón Kristjánsson heilbrigðisráðherra segir þetta þó ekki þýða að skattar á áfengi hækki hér á landi, enda séu þeir ærnir fyrir.

Bilið fer vaxandi

Bilið á milli forsetaframbjóðendanna í Bandaríkjunum fer vaxandi og Bush forseti virðist í sókn samkvæmt könnunum. Bandarísk dagblöð stilla sér nú á bak við þann frambjóðanda sem þeim líkar best við.  

Viðloðnir gjöreyðingavopn Íraka?

Bandaríska leyniþjónustan CIA segir að danskt fyrirtæki hafi selt vélbúnað til fyrirtækis í Írak sem gat framleitt gjöreyðingarvopn í valdatíð Saddams Hússeins. Með því að breyta danska vélbúnaðinum og tengja hann við annan búnað hafi verið hægt að framleiða vopnin.

Óveður á Kjalarnesi

Óveður er á Kjalarnesi og hafa hviður þar farið yfir 40 metra á sekúndu. Í morgun valt vörubíll frá fyrirtækinu Fönn á hliðina í vindhviðu á Vatnsnesvegi á Kjalarnesi. Ökumaður bílsins slapp ómeiddur. Á tólfta tímanum fauk svo byggingardót úr ókláruðum sumarbústað yfir Vesturlandsveg. Þá hnikaðist annar ókláraður bústaður á járngrindum við Kjalarnes úr stað í heilu lagi en endaði ferðina við skemmu í nágrenninu.

Mikið magn vopna fannst hjá ETA

Hrúga af vopnum í eigu aðskilnaðarsamtakanna ETA fundust í suðvesturhluta Frakklands í morgun. Lögregla fann sprengjuvörpur, vélbyssur, riffla, skammbyssur og yfir 70 þúsund skotfæri við leit í hýbýlum ETA í morgun.

Vilja hærri skatta á áfengi

Hækka þarf skatta á áfengi í því markmiði að draga úr neyslu þess. Þetta er sameiginleg niðurstaða heilbrigðis- og félagsmálaráðherra á Norðurlöndum, eftir að hafa fjallað um áfengismál á sérstökum aukafundi í Kaupmannahöfn. Fundinum lauk í gær. 

Á meðal stærstu fyrirtækja Evrópu

Tvö íslensk sjávarútvegsfyrirtæki eru meðal þriggja stærstu sjávarútvegsfyrirtækja Evrópu. Fyrirtækin sem um ræðir eru SH, sem er í öðru sæti, og SIF Group sem er í því þriðja.

Annan hrósar Norður-Írum

Kofi Annan, aðalritari Sameinuðu þjóðanna, segir umleitanir til friðar í Norður-Írlandi undanfarin ár vera frábærar og þær hvetji heimsbyggðina til dáða í viðleitni sinni til friðar.

Veikindin aldrei útskýrð

Orsakir persaflóaheilkennisins svokallaða, sem eru óútskýrð veikindi hermanna sem börðust í fyrra Íraksstríðinu, verður líklega aldrei hægt að staðfesta. Yfir sex þúsund hermenn sem börðust við Persaflóa í upphafi tíunda áratugarins þjást nú af óútskýrðum einkennum af ýmsu tagi.

Klónun manna verði leyfð

Hópur vísindamanna í Bretlandi vill að Sameinuðu þjóðirnar skelli skollaeyrum við yfirlýsingum George Bush Bandaríkjaforseta um að banna eigi allar tegundir klónunar á mönnum í framtíðinni. Í Bretandi er klónun stofnfrumna í lækningaskyni leyfð og vilja vísindamennirnir að svo verði áfram.

Varað við akstri hjá Hafnarfjalli

Undir Hafnarfjalli er mikið hvassviðri og varar lögreglan í Borgarnesi fólk eindregið við að keyra þar um. Fjórir bílar hafa farið út af veginum undir Hafnarfjalli í dag og einn minniháttar árekstur varð vegna hvassviðrisins.

Innanlandsflug liggur niðri

Allt innanlandsflug Flugfélags Íslands liggur niðri og hefur ekkert verið flogið síðan fyrir hádegi. Klukkan hálf fimm verður athugað hvort hægt verði að fljúga á nýjan leik en á flestum stöðum er útlitið ekki bjart.

Hálfgert neyðarástand í Eyjum

Hluti af þekju úr þaki svonefnds IMEX-húss við Strandveg í Vestmannaeyjum fauk fyrir rúmum klukkutíma síðan. Þakhlutinn sem fór í einu lagi var mjög stór og skemmdi að minnsta kosti einn bíl mikið.

Öxará iðar af fiski

Metveiði var í mælingaferð Veiðimálastofnunar á Þingvelli fyrir helgi. Stofn Þingvallaurriðans er í vexti, en nær tæpast fyrri stærðum nema hrygningarstöðum verði fjölgað. Fiskurinn hrygnir í Öxará en var áður líka í útfalli Þingvallavatns í Efra-Sogi.

Fleiri breskir hermenn til Íraks?

Bandaríkjamenn hafa farið þess á leit við bresk stjórnvöld að þau sendi aukinn herafla til Íraks. Geoff Hoon, varnarmálaráðherra Bretlands, greindi frá því á breska þinginu í dag að beiðni þessa efnis hafi borist ráðuneytinu í síðustu viku en ákvörðun um hvort farið verði að óskum Bandaríkjamanna liggi ekki fyrir.

Skarð hannað en ekki ákveðið

Í Efra-Sogi milli Þingvallavatns og Úlfljótsvatns, þar sem áður eru taldar hafa verið aðalhrygningarstöðvar Þingvallaurriðans, var Steingrímsstöðvarvirkjun tekin í notkun árið 1959.

Besti vefurinn tilnefndur

Val á besta íslenska vefnum stendur þessa dagana yfir vegna Íslensku vefverðlaunanna sem veitt verða í fjórða sinn föstudaginn 29. október. Hægt er að tilnefna vefi til miðnættis annað kvöld á vef <strong><a href="http://www.vefsyn.is" target="_blank">Vefsýnar</a></strong>.

Einn látinn og annar á gjörgæslu

Pólskur karlmaður að nafni Lukas Zewicz Rafal Maciej lést þegar jeppabifreið fór út af þjóðvegi eitt við bæinn Brekku í Skagafirði skömmu fyrir klukkan hálf ellefu á sunnudagskvöldið.

Vænlegar tegundir til fiskeldis

Staða einstakra eldistegunda og þörf á rannsókna- og þróunarvinnu verður til umræðu á ráðstefnu sem haldin verður af Fiskeldishópi AVS og Landssambandi fiskeldisstöðva í Reykjavík á föstudaginn.

Jeb ekki á leið í forsetaframboð

Jeb Bush, ríkisstjóri í Flórída, lýsti því yfir í sjónvarpsviðtali að hann ætlaði sér ekki að feta í fótspor föður síns og bróður, sem báðir hafa náð kjöri sem forseti Bandaríkjanna, í það minnsta ekki eftir fjögur ár.

Meingallaðar þingkosningar

Mikið vantaði upp á að framkvæmd þingkosninga í Hvíta-Rússlandi um helgina uppfyllti þær kröfur sem gerðar eru til kosninga í lýðræðisríkjum. Þetta er niðurstaða kosningaeftirlitsmanna frá Öryggissamvinnustofnun Evrópu, ÖSE.

Útlendingar látnir í bílslysum

Það sem af er ári hafa fjórir útlendingar látist í umferðarslysum hér á landi, samkvæmt upplýsingum Umferðarstofu. Tveir í júlí og svo tveir í þessum mánuði.

Vopnaðar löggur umkringja leikara

Lögreglan í Osló var fljót á vettvang þegar vegfarandi sagðist hafa séð vopnaða menn ráðast inn á bar. Lögreglumennirnir voru vel vopnaðir þegar þeir mættu á staðinn og réðust gegn ræningjunum. Það kom þeim hins vegar í opna skjöldu þegar einn ræninginn henti frá sér vopnunum og kallaði: "Það er allt í lagi. Við erum að taka upp mynd."

Semja ekki um auðgun úrans

Írönsk stjórnvöld heimila embættismönnum sínum ekki að semja við Evrópuþjóðir um framtíð kjarnorkuáætlunar landsins ef markmið Evrópumanna er að svipta Írana réttinum til að auðga úraníum. Þetta sagði Hasan Rowhani, aðalsamningamaður Írana, í gær.

Vilja bæta stöðu samkynhneigðra

Írar íhuga að veita samkynhneigðum pörum réttindi sambærileg við gagnkynhneigð hjón. Þingmenn úr öllum flokkum koma saman til fundar í viku þar sem þeir ræða réttindi samkynhneigðra. Óvíst er þó hversu langt verður gengið í réttarbót samkynhneigðra.

Borgin þrýsti á ríkið

Listi Frjálslynda flokksins í Reykjavíkurborg mun á borgarstjórnarfundi á morgun leggja fram tillögu um að Reykjavíkurborg beiti sér fyrir þrýstingi á ríkisvaldið um að það komi að verkfallli grunnskólakennara.

Grafið undan samningum

Alþýðusamband Íslands segir nýja verðbólguspá greiningadeildar Landsbanka Íslands staðfesta enn að grafið sé undan forsendum kjarasamninga. Gert var ráð fyrir 2.5% verðbólgu á næsta ári í kjarasamningum, 3.5% í forsendum fjárlagafrumvarpsins og Landsbankinn spáir nú stöðugt 3-3.5% verðbólgu til 2007.

Herinn rukkaði særðan hermann

Tyson Johnson III lá enn þá á sjúkrahúsi þar sem hann var að jafna sig af sárum sem hann hlaut í Írak þegar honum barst bréf frá hernum þar sem hann var rukkaður um andvirði tæpra 200 þúsund króna. Upphæðin var sú sama og skráningarbónus sem hann fékk fyrir að skuldbinda sig til þriggja ára herþjónustu.

Vinna gengur vel í Eyjum

Björgunaraðgerðir í Vestmannaeyjum ganga vel að sögn Adolfs Þórssonar, formanns Björgunarsveitarinnar í Vestmannaeyjum. Búið er að festa þakplötur á þremur húsum í bænum ásamt því að björgunarsveitarmenn eru að fergja þakhlutana og festa sem fuku af IMEX-húsinu á þriðja tímanum í dag. Adolf segir veðrið hins vegar enn mjög slæmt.

Andvaraleysi gagnrýnt

Steingrímur J. Sigfússon, formaður vinstri-grænna gagnrýndi íslensk stjórnvöld fyrir andvaraleysi í umræðum um heræfingar rússneska flotans hér við land á Alþingi í gær. Taldi hann vítavert að hálfur mánuður hefði liðið frá því að rússneskra skipa varð vart hér við land þar til íslensk stjórnvöld hafi leitað skýringa hjá Rússum.

Flug liggur enn niðri

Allt innanlandsflug Flugfélags Íslands liggur enn niðri og hefur ekkert verið flogið síðan fyrir hádegi. Ekki verður flogið til Egilsstaða eða Ísafjarðar í bráð en verið er að athuga hvort unnt reynist að fljúga til Akureyrar þegar kvölda tekur.

Einn lést og annar á gjörgæslu

Pólskur karlmaður á fertugsaldri beið bana og landi hans slasaðist alvarlega þegar jeppi sem þeir voru í valt skammt frá Varmahlíð í Skagafirði í gærkvöldi. Bíllinn var á sumardekkjum en fljúgandi hálka var á svæðinu. Fjórir voru í bílnum en enginn í bílbeltum.