Hryðjuverkamenn voru á eiturlyfjum

Hryðjuverkamennirnir í Beslan voru á eiturlyfjum og í umsátrinu um skólann þar voru margir þeirra í fráhvarfi, eftir því sem rússnesk yfirvöld fullyrða.  Hryðjuverkamennirnir, sem héldu mörg hundruð skólabörnum í gíslingu í borginni Beslan í Rússlandi fyrir nokkrum vikum, voru á eiturlyfjum. Rússnesk yfirvöld segja krufningu á líkum þeirra hryðjuverkamanna sem féllu hafa leitt þetta í ljós. Þrjátíu og einn mannræningi féll í átökum við rússneskar sérsveitir og segir saksóknari í Suður-Rússlandi að allir beri einkenni langvarandi eiturlyfjanotkunar. Mikið af heróíni og morfíni fannst í blóði hryðjuverkamannanna. Sumir þeirra hafi verið með svo mikið af lyfjunum í blóðinu að það hefði átt að reynast þeim banvænt. Það bendi til þess að þeir hafi verið háðir eiturlyfjum um hríð. Sumir hafi verið í fráhvarfi á meðan umsátrinu stóð þar sem þeir hafi orðið uppiskroppa með eiturlyf. Það kunni að hafa haft áhrif á hegðan þeirra og hugsanlega ástæða þess hvernig fór í Beslan að mati saksóknarans. Að lokinni gíslatökunni í skólanum og átökum í kjölfarið lágu yfir þrjú hundruð í valnum. Yfirlýsingum saksóknarans er tekið með nokkrum efa. Rússnesk yfirvöld hafa margoft áður sagt hryðjuverkamenn undir áhrifum eiturlyfja. Ástæðan sé sú að skipuleggjendur hryðjuverka fylli saklaust fólk af eitri til að lokka það til illra verka. Þessi útskýring hefur einkum verið notuð til að útskýra sjálfsmorðsárásir ungra kvenna og aðrar árásir þar sem ekki er þörf á miklu skipulagi og ekki notast við flókinn búnað. Hryðjuverkamennirnir í Beslan voru hins vegar þaulskipulagðir. Þeir höfðu gert áætlanir um hvernig verjast ætti árás, þeir höfðu komið fyrir sprengjum og njósnað um skotmörk sín í langan tíma. Það þykir ekki samræmast hegðun dópista í fráhvarfi. Fjöldamörgum spurningum varðandi atburðina í Beslan er enn ósvarað. Rannsóknarnefnd skilaði frumskýrslu í síðustu viku þar sem fram kemur að þungavopnum var beitt gegn hryðjuverkamönnunum og þeirri spurningu varpað fram hvort að lífi fórnarlambanna hafi þannig verið stefnt í óþarfa hættu. Að auki er ennþá óljóst hversu margir hryðjuverkamennirnir voru og hvort einhver þeirra komst undan.