Glittir í endur­komu sumarsins

Einar Sveinbjörnsson segir að svalt verði um hvítasunnuhelgina en að þó muni víða sjást til sólar, einkum sunnan- og vestanlands. Á miðvikudaginn næsta séu hins vegar breytingar í kortunum. Í stað norðvestanáttar í háloftunum verður hann sunnanstæður og bleyti loks í sunnan- og suðvestantil.

Einar bendir á tvö kort sem sýna annars vegar veðuraðstæður í gær og hins vegar eftir viku, föstudaginn þrettánda. Það fyrra sýnir kalda tungu úr norðri með -4 gráðum í 850 hPa. Þykktin gælir við hita um frostmark jafnvel á láglendi. Eftir viku verði allt annað uppi á teningnum.

„Þykktin gefur til kynna 15-20 stiga hita ef sólin nær að skína,“ segir hann.

„En það sem mestu skiptir er snúningurinn og veðurbreytingin sem í vændum er fljótlega eftir hvítasunnuhelgina. Hlýnandi veður og nýja snjóinn til fjalla tekur vonandi fljótt upp,“ segir Einar Sveinbjörnsson veðurfræðingur.