Stór­hríð og foktjón í vændum

Viðvaranirnar ná til allra landshluta einhvern part dagsins en á Vestfjörðum, Breiðafirði, Ströndum og Norðurlandi vestra er búist við stórhríð, miklu roki og lélegu skyggni. Á Austfjörðum geta vindhviðurnar náð yfir 40 metrum á sekúndu og varað er við hættulegum akstursskilyrðum.

Miklum vindi og úrkomu má búast við um allt landið og á höfuðborgarsvæðinu er gul viðvörun í gildi frá klukkan 15 til 20. Þá er spáð vestanvindi 15-20 m/s og versnandi akstursskilyrðum.

Búist er við því að óveðrið vari fram á nótt og tekið er fram á heimasíðu Veðurstofunnar að það verði ekkert ferðaveður á mestöllu landinu. Varað er jafnframt við staðbundnu foktjóni víða.