Rigning, slydda og jafnvel snjókoma norðaustanlands

Lovísa Arnardóttir skrifar 15. september 2024 08:39

Það verður líklega ekki þessi blíða á Raufarhöfn í dag. Þar gæti jafnvel snjóað. Myndin er úr safni. Vísir/Vilhelm

Í dag verður norðan og norðvestan 5 til 10 metrar á sekúndu en 10 til 15 á austanverðu landinu framan yfir hádegi. Þá verður skýjað og rigning eða slydda norðaustanlands, jafnvel snjókoma inn til landsins, en styttir upp síðdegis. Yfirleitt bjart í öðrum landshlutum. Í kvöld á svo að lægja. Hiti verður líklega í dag á bilinu 3 til 12 stig og verður hlýjast sunnanlands.

Í hugleiðingum veðurfræðings kemur fram að á morgun verði svo vaxandi austanátt og þá fari að rigna, fyrst sunnanlands. Samhliða því verður austan og suðaustan 10 til 18 metrar á sekúndu með rigningu í flestum landshlutum seinnipartinn, en úrkomuminna norðaustanlands. Hiti verður á bilinu 6 til 12 stig.

Á þriðjudag snýst svo í suðvestan 5 til 13 metra á sekúndu með dálítilli vætu en þurrt að kalla austantil. Vaxandi austanátt með rigningu um mest allt land um kvöldið. Hiti 7 til 15 stig, hlýjast fyrir austan. Nánar á vef Veðurstofunnar.

Á vef Vegagerðarinnar kemur fram að vetrarfærð sé á vegum á Norðausturlandi og Austurlandi og þeir því ekki færir bílum sem ekki eru vetrarbúnir. Þá eru margir vegir á hálendi ófærir eða ekki vitað um ástand þeirra.

Veðurhorfur á landinu næstu daga

Á mánudag:

Gengur í austan og suðaustan 13-20 m/s, hvassast syðst. Víða rigning en úrkomuminna norðaustanlands. Hiti 7 til 12 stig.

Á þriðjudag:

Suðaustlæg átt, víða 8-15 m/s og dálítil rigning í flestum landshlutum, en norðaustlægari norðvestantil. Hvessir heldur og bætir í rigningu um kvöldið. Hiti 8 til 14 stig, hlýjast austantil.

Á miðvikudag:

Suðaustlæg átt og rigning eða skúrir, en úrkomulítið á Norðausturlandi. Hlýtt í veðri.

Á fimmtudag:

Breytileg átt og skýjað en lengst af þurrt. Hiti 3 til 8 stig.

Á föstudag:

Austlæg átt og dálítil væta, en þurrt að kalla fyrir norðan og austan. Hiti breytist lítið.

Á laugardag:

Útlit fyrir breytilega átt. Skýjað og víða úrkomulítið, en rigning á norðvestanverðu landinu. Hiti 5 til 10 stig.

Færð á vegum Veður