Bætir í ofankomu og viðbúið að færð versni

Eiður Þór Árnason skrifar 30. mars 2024 07:31

Él verður á Norður- og Austurlandi, en þurrt og bjart um landið sunnanvert. vísir/vilhelm

Í dag er spáð norðaustan 10 til 18 metrum á sekúndu, en hvassara í vindstrengjum undir Vatnajökli. Él á Norður- og Austurlandi, en þurrt og bjart um landið sunnanvert. Frost 0 til 6 stig, en frostlaust við suðurströndina yfir daginn.

Norðaustan 13 til 20 metrar á sekúndu og víða snjókoma eða él á morgun, en þurrt að kalla sunnan- og suðvestanlands. Áfram kalt í veðri.

Fram kemur í hugleiðingum veðurfræðings hjá Veðurstofu Íslands að það sé nú allmikil hæð yfir Grænlandi en lægðasvæði suður og suðaustur af Íslandi. Þessi staða breytist lítið næstu daga og landið sitji í kaldri norðaustanátt.

Norðaustan stinningskaldi eða allhvasst verði víða um land í dag. Á fjallvegum fyrir norðan og austan geti jafnframt verið erfið akstursskilyrði og jafnvel ófærð utan þjónustutíma. Því sé mikilvægt að kanna aðstæður á vegum hjá Vegagerðinni áður en lagt er af stað í ferðalag. Að sögn veðurfræðings bætir í ofankomu á morgun og er þá viðbúið að færð versni á norðan- og austanverðu landinu.

Á Suðausturlandi megi staðbundið búast við enn hvassari vindi, einkum undir Vatnajökli og þessir vindstrengir geti verið varasamir fyrir ökutæki, einkum þau sem eru viðkvæm fyrir vindi. Einnig séu líkur á sandfoki í þurrum norðanvindinum. Á mánudag sé síðan útlit fyrir að dragi bæði úr vindi og ofankomu, en að áfram verði kalt í veðri.

Veðurhorfur á landinu næstu daga

Á sunnudag:

Norðaustan 13-20 m/s og víða él eða snjókoma, en þurrt að kalla sunnanlands. Frost 0 til 7 stig.

Á mánudag:

Norðaustan 8-15 og él norðan- og austanlands, en bjartviðri sunnan heiða. Hiti breytist lítið.

Á þriðjudag:

Minnkandi norðaustanátt og léttskýjað, en skýjað á Norður- og Austurlandi og lítilsháttar él framan af degi. Frost 1 til 7 stig og kólnar meira um kvöldið.

Á miðvikudag og fimmtudag:

Hæg breytileg átt og víða þurrt og bjart veður. Kalt í veðri, talsvert frost að kvöld- og næturlagi.

Á föstudag:

Útlit fyrir austlæga átt með dálitlum éljum sunnan- og austantil.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir