Frum­sýndu lag og boðuðu fyrstu nýju plötuna í tæpa tvo ára­tugi

Platan kemur út þann 20. október næstkomandi og ber heitið Hackney Diamonds, eða Hackney demantar. Hackney er hverfi í Lundúnum, þar sem hljómsveitin var stofnuð, og Hackney diamonds er breskt slangur yfir glerbrot á vettvangi innbrots.

Hljómsveitin kynnti plötuna í hverfinu í dag á viðburði þar sem spjallþáttastjórnandinn geðþekki Jimmy Fallon spurði meðlimi hljómsveitarinnar um efni hennar.

Platan samanstendur af tólf nýjum lögum, þar af tveimur sem tekin voru upp ásamt Charlie Watts heitnum, trymbli hljómsveitarinnar til áratuga sem lést árið 2021.

Trymbillinn Steve Jordan hefur tekið sæti Watts og spilar nú ásamt þeim Sir Mick Jagger, Keith Richards og Ronnie Wood. Richards sagði á viðburðinum í dag að það hefði verið erfitt að taka plötuna upp án Watts en að hann hefði veitt blessun sína fyrir því að Jordan tæki við af honum fyrir andlát hans.

Fengu stórstjörnur í lið með sér

Ásamt því að kynna plötuna frumsýndu þeir félagar nýja lagið Angry og tónlistarmyndband við það. Leikkonan Sydney Sweeney, sem hefur getið sér gott orð undanfarið í sjónvarpsþáttaröðum á borð við Euphoria og The White Lotus, leikur aðalhlutverkið í tónlistarmyndbandinu.

Þá kom fram á viðburðinum í dag að stórstjarnan Lady Gaga syngi inn á plötuna og í frétt breska ríkisútvarpsins segir að sagan segi að sjálfir Sir Paul McCartney og Stevie Wonder geri það sömuleiðis.

Sveitin gaf síðast út smáskífu árið 2016. „Við höfum verið á tónleikaferðalagi nánast sleitulaust síðan þá og kannski vorum við aðeins of latir. Síðan sögðum við „setjum okkur frest.“,“ sagði Jagger í dag.