Umræða um fjármálaáætlun fyrir árin 2024 til 2028 fór fram á síðasta fundi fyrir páskafrí þingmanna í dag. Þar sagði Bjarni Benediktsson fjármálaráðherra að áætlunin fæli í sér skýr markmið.
„Í fyrsta lagi að styðja við Seðlabankann í því verkefni að tempra verðbólgu. Í öðru lagi að verja árangur síðustu ára við að byggja upp framúrskarandi lífskjör og kaupmátt. Og í þriðja lagi að byggja undir áframhaldandi vöxt samfélagsins til framtíðar,“ sagði Bjarni.
Þingmenn stjórnarandstöðunnar sögðu áætlunina hvorki vinna gegn verðbólgu né bæta heimilum landsins upp miklar vaxtahækkanir að undanförnu. Ríkisstjórnin fresti meira og minna öllum aðhaldsaðgerðum fram á næstu ár.
Rætt var við stjórnarandstæðingana Þorgbjörgu Sigríði Gunnlaugsdóttur, þingmann Viðreisnar, og Björn Leví Gunnarsson, þingmann Pírata í kvöldfréttum Stöðvar 2 í kvöld.
Þorgbjörg Sigríður sagði að í stuttu máli skili fjármálaáætlunum ekki þeim markmiðum sem ríkisstjórnin hefur sett.
„Ef Bjarni Benediktsson hefði verið að skila verkefni í skólanum, þá væri hann að fá hreina og klára falleinkunn. Kennarinn myndi segja við hann, þú varst ekki að svara þeim spurningum sem fyrir voru lagðar. Stóra verkefnið núna er verðbólgan, að sporna við henni til að heimilin þurfi ekki að vera að glíma við vaxtahækkanir og hækkandi verðlag. Bjarni er ekki að spila með Seðlabankanum í því heldur er aftur að kasta inn handklæðinu og skilja Seðlabankann einan eftir. Því miður,“ segir hún.
Björn Leví segist taka hjartanlega undir með Þorbjörgu Sigríði og segir að sett verðbólgu markmið upp á 2,5 prósent muni aldrei nást með fjármálaáætluninni.
„Miklu frekar einmitt út af aðgerðum Seðlabankans sem eru eins og einhver risastór sleggja á hagkerfið. Kannski aðeins of stór hvað það varðar. En efnahagsstefna ríkisstjórnarinnar er á einhverjum allt öðrum stað. Nú skilur maður í rauninni af hverju Seðlabankinn hækkaði um eitt prósent,“ segir hann.
Hagræðinguna vanti
Þau sammælast um það að ríkisstjórnin hefði þurft að ráðast í frekari hagræðingu á ríkisrekstrinum til þess að vinna bug á verðbólgunni. „Það er alltaf erfitt pólitískt, það er auðveldara að henda út einstaka fjárfestingu og færa vandann annað en það vantar hagræðingu,“ segir Þorbjörg Sigríður.
Það vantar hagræðingu í þessu, við erum ekki að sjá á þessu í rauninni, að það sé verið að taka neitt á tekju- eða gjaldahliðinni. Það er sagt að það sé ábáti þarna, en það er enginn,“ segir Björn Leví.
Að lokum segja þau að ríkisstjórnin geri einfaldlega of lítið og of seint með áætluninni.
