Heljarinnar verð­munur á sömu flug­ferðinni

Sami miðinn kostaði 85 þúsund krónur hjá Icelandair en 51 þúsund krónur hjá SAS.

Jóhann Örn B. Benediktsson segir í samtali við Vísi að hann hafi verið að skoða farmiða hjá Icelandair og hafi tekið eftir því að seinni liður ferðarinnar væri með flugvél SAS. Þá hafi hann kíkt á vef þess flugfélags til að skoða verðið.

„Fyrst þegar ég skoðaði flugið með Icelandair kostaði það 85 þúsund krónur. Á vef SAS kostaði það 51 þúsund,“ segir Jóhann.

Hann keypti miða af vef SAS og fór til baka inn á vef Icelandair til að taka skjáskot af verðinu þar. Þá hafði verðið hækkað um tuttugu þúsund krónur og var nú 105 þúsund.

„Þetta er sami farmiðinn og hjá Icelandair, sama farangursheimildin og sömu flugvélarnar,“ segir Jóhann.

Verðið hafði ekkert hækkað á vef SAS á sama tíma hjá Jóhanni en það var fyrir hádegi.

Verðið hefur enn ekki breyst á vef SAS. Fyrst stóð hér að verðið hefði hækkað en það var rangt og hefur fréttinni verið breytt til marks um það.

Uppfært kl. 18: Í skriflegu svari Guðna Sigurðssonar, upplýsingafulltrúa Icelandair, við fyrirspurn fréttastofu segir að ástæðan fyrir muninum virðist aðallega liggja í því að SAS bjóði lægri fargjöld á sínum flugleggjum í gegnum heimasíðu sína en Icelandair greiði fyrir leggina samkvæmt samningi á milli félaganna.