Lög­reglan hafði af­skipti af Greenwood áður en hann var hand­tekinn

Mason Greenwood var handtekinn snemma árs 2022 og hefur ekki spilað fyrir Man United síðan þann 19. janúar sama ár. Hann var upprunalega handtekinn eftir að kona sem hann var í sambandi með birti myndir af sér blóðugri og birti hljóðbrot þar sem heyra má Greenwodo reyna þvinga hana til samræðis.

Í dag birti The Athletic ítarlega grein þar sem farið er ofan í saumana á hegðun leikmannsins áður en hann var handtekinn. Þar kemur fram að leikmaðurinn hafi ítrekað talið sig hafinn yfir lögin og betri en samherja sína.

Þegar samkomubann var í Bretlandi vegna Covid-19 þá hafði lögreglan oftar en einu sinni afskipti af Greenwood. Hann sást þenja Mercedes-Benz bifreið sína í Altrincham-hverfinu í Manchester þegar fólki hafði verið ráðlagt að halda sig innandyra. Þá hélt hann reglulega partí í íbúð sem hann leigði í Salford.

Lögreglan vissi af þessu en í stað þess að handtaka Greenwood þá lét hún Man United vita. Var þetta ekki í fyrsta skipti sem leikmaðurinn lenti í veseni á sínum stutta ferli. Ekki þurfti að leita langt aftur til að finna svipuð dæmi.

Sem dæmi má nefna hegðun leikmannsins hér á landi, þar sem hann spilaði sinn eina A-landsleik.

Þá kemur að hegðun leikmannsins hjá Man United. Hann mætti oftar en ekki seint á æfingar og stundum mætti hann ekki yfir höfuð. Átti starfsfólk félagsins oft erfitt með að komast að því hvar Greenwood væri.

Ole Gunnar Solskjær, þáverandi þjálfari liðsins, varði leikmanninn þó í fjölmiðlum og sagði hann alltaf mæta á réttum tíma.

Starfslið félagsins gerði það sem það gat til að aðstoða Greenwood þar sem félagið taldi hann hafa einstaka hæfileika. Það virðist ekki hafa gengið og var leikmaðurinn á endanum handtekinn fyrir atburði sem eru töluvert alvarlegri en að skrópa á æfingu.

Greenwood er samt sem áður frjáls maður í dag eftir að saksóknarar létu málið falla niður þar sem lykilvitni í málinu höfðu dregið sig til hlés og vildu ekki bera vitni. Talsmaður embættis saksóknara sagði að ólíklegt væri að sakfelling myndi nást.

Leikmaðurinn hefur þó ekki enn spilað fyrir Man United þar sem félagið segist vera að framkvæma sína eigin rannsókn. Hvort hann spili aftur fyrir félagið verður að koma í ljós en samningur hans rennur út sumarið 2025.