Tónlist

„Endasendist um borgina með neyslubrjálað æðiber í rassinum“

Sylvía Rut Sigfúsdóttir skrifar
Birkir Blær (til vinstri) er höfundur lagsins Jólainnkaupalistinn.
Birkir Blær (til vinstri) er höfundur lagsins Jólainnkaupalistinn. Samsett

Vísir frumflytur í dag lagið Jólainnkaupalistinn. Það er Fjarkar sem gefur lagið út en hópurinn er samanskipaður hæfileikaríkum tónlistarmönnum. Þeir hafa þá hefð að gefa út jólalag á hverju ári.

Aron Steinn Ásbjarnarson spilar á saxófón, Örn Ýmir Arason á kontrabassa og Þorkell Helgi Sigfússon á gítar. Allir syngja þeir lagið. Þeir kalla sig fjögurra manna tríó og því varð nafnið Fjarkar fyrir valinu. Birkir Blær Ingólfsson gerir texta.

„Lagið heitir Jólainnkaupalistinn og segir af manni sem er kominn í blússandi jólagír, endasendist um borgina með neyslubrjálað æðiber í rassinum til að kaupa allt sem til þarf svo jólin verði fullkomin. En uppgötvar svo að allar þessar jólavörur skipta engu máli. Það sem honum þykir raunverulega jólalegt er að verja tíma með þeim sem hann elskar við kertaljós - sem kostar náttúrlega svo gott sem ekkert. Og það er fallegt,“ segir Birkir Blær, sem er höfundur textans. 

Tríóið Fjarkar heldur eina jólahefð í heiðri - að semja og gefa út eitt jólalag á ári. 

„Þetta er orðinn fastur liður af jólahaldinu, jafnheilagur og skötuboð og skreytt jólatré. Fyrir vikið hefur safnast upp fínasti katalógur af jólalögum sem nálgast má á Spotify. Og nú er þetta nýja lag að koma út. Tríóið Fjarkar er 50's doo wop spilsyngjandi fjögurra manna tríó sem nýtur liðsinnis færustu tónlistarmanna Íslands við upptökur á litlum ilmandi jólalummum,“ útskýrir Birkir Blær. 

Lagið Jólainnkaupalistinn má heyra í spilaranum hér fyrir neðan og textann má svo lesa neðst í fréttinni. Hægt er að hlusta á fleiri lög frá þeim á Spotify.

Klippa: Fjarkinn - Jólainnkaupalistinn

Jólainnkaupalistinn

Mig vantar sörur

mikið skraut

möndlugraut

óteljandi vörur

laufabrauð

feitan sauð



mandarínur

jólatré og fyllta pekingönd

og gjafabréf á sólarströnd



Ég kaupi jólin,

kemst í jólagír.

Ég ætlað sýna öllum hvar

jólaandinn býr!



Hvar fæ ég hvítöl

kyrrð og ró

og jólasnjó,

hvers kyns jólameðöl,

jólaljós

og jól í dós.



Ég fer í átta búðir til að

finna mistiltein

og leigi síðan jólasvein.



Ég kaupi jólin

kemst í jólagír.

Ég ætlað sýna öllum hvar

jólaandinn býr.



Ég gerði listann minn

af nákvæmni og alúð

en ég finn

að jólahátíðin

fæst víst ekki í búð.



Ég keypti jólin

en staðreyndin er sú

að það sem mér finnst jólalegt

er kertaljós og þú.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.