Menning

„Listin alltaf verið mín leið til að takast á við lífið“

Dóra Júlía Agnarsdóttir skrifar
Listakonan Sara Oskarsson er að opna vinnustofu og listasýningu á Hverfisgötu.
Listakonan Sara Oskarsson er að opna vinnustofu og listasýningu á Hverfisgötu. Aðsend

Listakonan Sara Oskarsson opnar vinnustofu sína fyrir almenningi næstkomandi laugardag á sama tíma og hún opnar listasýninguna GLÓÐ. Hún byrjaði að mála af alvöru fyrir tuttugu árum síðan en hefur þó verið skapandi síðan hún man fyrst eftir sér. Blaðamaður heyrði í Söru og ræddi við hana um það sem er á döfinni.

Sara hefur komið víða að í heimi listarinnar en fjallað hefur verið um verk hennar í Telegraph í Bretlandi og á Arte.Tv í Frakklandi, Þýskalandi og Austur Evrópu. Verkin hafa selst til listaverkasafnara víða um heiminn og hún hlaut tilnefningu til Art Gemini Prize í Bretlandi árið 2013. Hún hefur einnig haldið margar einkasýningar og tekið þátt í ýmsum samsýningum.

Sara Oskarsson hefur stundað myndlist að alvöru í tuttugu ár.Aðsend

„Í skóla var ég oft fengin til að búa til listaverk fyrir ýmsar hátíðir í skólanum. Þegar að ég var tíu ára fékk ég pening frá ömmu og afa í jólagjöf sem ég notaði til þess að kaupa mér stóra bók um Van Gogh. Það sýnir kannski hversu snemma myndlistaráhuginn var orðinn alvarlegur hjá mér,“ segir Sara um upphaf listsköpunarinnar hjá henni. 

Þá takmarkaðist sköpunargleðin ekki við myndlistina. „Ég samdi líka ljóð og skrifaði leikrit sem barn. 

Listin hefur í raun alltaf verið mikilvægasta tungumálið og tjáningarformið mitt.“

Ástríðufullar tilraunir á striga

Í verkum Söru eru efnin sjálf þungamiðjan.

„Þegar að byrjaði að mála fyrir alvöru fyrir um 20 árum síðan fannst mér þessi hefðbundnu efni of takmarkandi.“

Hún sækir innblásturinn víða, þar á meðal í efnafræði og finnst erfitt að ná ákveðinni sín í gegn með venjulegri akrýl og olíu málningu.

„Ég hafði stuttlega lært efnafræði í háskóla þannig að ég fór fljótlega að gera tilraunir með ýmis konar efni og aðferðir í málverkinu. Í dag er verkfærakassinn minn orðinn nokkuð víðtækur. Auk málningar nota ég vax, resin, ekta málma á borð við kopar, járn og brons, ýmis konar blektegundir, litarefni sem skipta um lit eftir hitastigi og jafnvel kristalla.

Ég held nákvæma dagbók utan um efnin og aðferðirnar mínar og set þetta svo saman í bók svo að ég hafi nákvæma skrá yfir tilraunirnar. 

Efnafræði kemur töluvert við sögu við sköpun og þróun málverkanna sem ég kalla stundum ástríðufullar tilraunir á striga.“

Hún segir tryggð sína við málverkið sem miðil einnig skipa veigamikið hlutverk í vinnunni.

„Á meðan að efnin sjálf eru að þróast og breytast þá eru möguleikar „málverksins“ auðvitað ótæmandi. Og eins og einhver sagði: „Painting’s not dead, it’s just hard,“ eða málverkið er ekki dautt, það er bara erfitt að mála.“

Sonurinn kom með hugmyndina

Hugmyndin að sýningunni GLÓÐ kviknaði út frá samtali Söru við 22 ára gamlan son sinn, Þórð Harry.

„Hann horfði á eitt verkanna sem ég var að mála í vor og sagði: „Mamma, af hverju gerirðu ekki málverkaseríu út frá orðinu glóð?“ Hann er ótrúlega skarpur á vinnuna mína, les hana rétt og ég leita oft til hans með álit. Hann er núna að vinna með mér við uppsetningu sýningarinnar.

Eins verður þetta vinnustofuopnun þar sem að ég flutti á þessa nýju vinnustofu á Hverfisgötu í vor.“

Sér og skilur heiminn út frá málverkum

Sara útskrifaðist með B.A. gráðu í málun frá Edinburgh College of Art í Skotlandi árið 2012 eftir fjögurra ára nám sem hún segir hafa mótað sig mikið.

„Háskólaárin voru mér ótrúlega dýrmæt. Að fá þennan tíma til að einbeita sér fullkomlega að þróun verkanna og vera með aðgang að mismunandi deildum innan skólans var ómetanlegt. 

Frelsið og stuðningurinn sem ég fékk til að finna mína eigin rödd hafði gríðarleg áhrif á framþróun mína sem listamaður. 

Ég vaknaði til dæmis einn daginn og mig langaði til að bræða brons í málverk. Þá gat farið rakleiðis í skúlptúr deildina og fengið ósk mína uppfyllta.

En svo hefur listin líka alltaf verið mín leið til að takast á við lífið og helsta leiðin til að reyna að skilja það. Það má segja að ég sjái heiminn og skilji í málverkum,“ 

segir Sara að lokum.

Sýningaropnun verður frá klukkan 16:00 til 18:00 á laugardag á Hverfisgötu 14.


Tengdar fréttir

„Alltaf fundist þessar rætur stækka mig sem manneskju“

„Ég hef haft ástríðu fyrir myndlist síðan ég man eftir mér,“ segir listakonan Áslaug Íris Katrín. Blaðamaður tók púlsinn á henni og fékk að heyra nánar frá nústandandi einkasýningum hennar og listræna lífinu.






Fleiri fréttir

Sjá meira


×