Veður

All­hvass vindur og væta með köflum

Atli Ísleifsson skrifar
Hiti á landinu í dag verður á bilinu tvö til átta stig.
Hiti á landinu í dag verður á bilinu tvö til átta stig. Vísir/Vilhelm

Veðurstofan spáir norðaustan- og austanátt með allhvössum vindi eða strekkingi í dag. Reikna má með vætu með köflum, en á Suðausturlandi og Austfjörðum verði rigningin samfelldari og ákefðin sums staðar talsverð.

Í hugleiðingum veðurfræðings segir að á Vesturlandi verði hins vegar úrkomulítið þó eitthvað dropi víðast hvar. Hiti verður á bilinu tvö til átta stig.

Óvissustigi almannavarna var lýst yfir á Austurlandi vegna skriðuhættu í gær. Mikið hefur rignt á svæðinu í nóvember og er grunnvatnsstaða há í landshlutanum. Sérstaklega er fylgst með skriðuhættu á Seyðisfirði.

„Norðaustan 5-15 m/s á morgun, hvassast norðvestantil á landinu. Rigning með köflum víða um land, en á Suður- og Vesturlandi verður yfirleitt þurrt. Eftir hádegi bætir svo heldur í úrkomu fyrir austan. Áfram milt í veðri,“ segir í hugleiðingum veðurfræðings.

Spákort fyrir klukkan 14.Veðurstofan

Veðurhorfur á landinu næstu daga

Á föstudag: Norðaustan og austan 5-15 m/s, hvassast norðvestantil. Þurrt að kalla á Suður- og Vesturlandi, annars væta með köflum, en bætir í úrkomu á norðaustanverðu landinu eftir hádegi. Hiti 2 til 7 stig.

Á laugardag: Suðlæg eða breytileg átt 10-18 um morguninn og allvíða rigning. Dregur úr vindi eftir hádegi og styttir upp í flestum landshlutum. Hiti breytist lítið.

Á sunnudag: Norðan 8-15 og rigning eða snjókoma með köflum, en úrkomumeira norðaustanlands. Yfirleitt þurrt sunnantil á landinu. Hiti 0 til 7 stig, mildast syðst.

Á mánudag: Breytileg átt og dálítil él norðanlands, annars þurrt að kalla. Víða vægt frost, en hiti um og yfir frostmarki við ströndina.

Á þriðjudag og miðvikudag: Suðlæg átt og fer að rigna, en úrkomulítið á Norður- og Austurlandi. Hlýnar í veðri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.