Fótbolti

„HM snýst ekki um bjór og brennivín“

Valur Páll Eiríksson skrifar
Þarf alltaf að vera bjór?
Þarf alltaf að vera bjór? Christopher Lee/Getty Images

„Fyrir mér ætti þetta að vera ævintýri fyrir fólk sem snýst ekki um bjór, heldur fótbolta“ segir fyrrum fótboltamaðurinn Jónas Grani Garðarsson sem starfar í Katar þar sem heimsmeistaramótið í fótbolta hófst í dag. Katarar hættu við bjórsölu í nánd við velli mótsins á föstudag.

Katörsk stjórnvöld höfðu gefið blessun sína yfir bjórsölu í kringum heimsmeistaramótið en tóku svo óvænta U-beygju á föstudaginn, tveimur dögum fyrir mót, og tóku fyrir slíka sölu. Jónas Grani segir að hægt sé að njóta fótbolta án öls.

„Ég held að ef menn gætu í einhverja smá stund áttað sig á því að HM snýst ekki um bjór og brennivín, þá held ég að menn gætu séð að þetta væri bara og verði flott. Það er mikið í lagt og ég held að þetta verði mjög flott mót,“

„Fólk mætti gjarnan sýna örlítið meira umburðarlyndi gagnvart því hvar þetta er og hætta kannski að horfa í það að bjórinn sé aðalatriðið. Þó að hann sé alveg ágætur þá þarf þetta ekki alltaf að snúast um það og það er ekki allt vonlaust þó að allt sé ekki eins og heima hjá þér,“ segir Jónas Grani.

Á að vera ævintýri

Jónas Grani segir fótbolta vera sameiningartákn og umræðan megi miða að því, fremur en áfengi.

„Fyrir mér ætti þetta að vera ævintýri fyrir fólk sem snýst ekki um bjór, heldur fótbolta í landi sem við áttum aldrei von á að myndi halda HM, frekar en við áttum von á því að Ísland myndi einhvern tíma spila á HM,“

„Fótbolti hefur víða um heim jafnvel stoppað bardaga og þannig á fótbolti að vera. Hann á ekki að snúast um bjór og hann á ekki að snúast um trúarbrögð. Hann á bara að snúast um leikinn og við eigum að sameinast um það horfa á fótboltann og njóta hans,“

Ein verslun í borginni sem selur áfengi

En hvernig er að finna sér ölsöpa í landinu?

„Meira en helmingurinn af hótelunum bjóða upp á bjór. Ansi mörg eru þurr eins og það er kallað. Svo er ein búð í Doha sem selur áfengi og svínakjöt. Ég hélt þetta væri keðja þegar ég kom en þetta er sem sagt bara ein búð,“


Tengdar fréttir

Á bak við tjöldin á HM í Katar: Mann­réttinda­brot, í­þrótta­þvottur og spilling

Tuttugasta og annað heimsmeistaramót karla í knattspyrnu, sem hefst í Katar í dag, er ef til vill það umdeildasta sem fram hefur farið hingað til. Mannréttindabrot, dauðsföll verkafólks og spilling er meðal þess sem vakin hefur verið athygli á í tengslum við mótið en umdeild saga þessa móts hófst árið 2010. Ekki í Katar heldur í fundarherbergi í Zurich í Sviss.

Átti að hreinsa upp skítinn en fær nú hæli í Katar

„Einbeitið ykkur að fótboltanum“ sagði Gianni Infantino, forseti FIFA, í bréfi til þátttökuþjóða á HM í Katar tæpum þremur vikum fyrir upphafsflaut mótsins sem hefst á sunnudaginn kemur. FIFA hefur dregið í land með ýmis loforð fyrir mótið og lítið pláss virðist vera fyrir mannréttindamál hjá forseta sem á nú hæli í gestgjafaríkinu.

RÚV á ekki að sýna frá HM í Katar

Sjónvarpsútsending frá HM í fótbolta er eina ástæðan fyrir áhuga Katar á því að halda keppnina. Gegnum sjónvarpið áformar þetta ríki þrælahalds, kúgunar og mannréttindabrota að skapa af sér glansmynd með hjálp vinsælustu íþróttar heims.

Bjórinn dýrari en á Íslandi

Fótboltastuðningsmenn á heimsmeistaramótinu í Katar hafa kvartað yfir verðinu á bjór og þeirri staðreynd að eini bjórinn sem þeim standi til boða sé Budweiser.

Segist þekkja mismunun því hann var rauðhærður með freknur

Gianni Infantino, forseti FIFA, hélt fjörtíu mínútna einræðu á blaðamannafundi í Katar í morgun þar sem hann sakaði Evrópubúa um hræsni í gagnrýni sinni gagnvart mótshöldurum. Þá bað hann um að fólki yrði leyft að njóta þess að fylgjast með heimsmeistaramótinu.




Fleiri fréttir

Sjá meira


×