Segist þekkja mismunun því hann var rauðhærður með freknur

Blaðamannafundur Gianni Infantino, forseta alþjóðaknattspyrnusambandsins FIFA, í Katar í morgun hefur vakið mikla athygli. 

Í aðdraganda mótsins hefur FIFA fengið mikla gagnrýni vegna ákvörðunarinnar um að halda mótið í Katar þar sem aðstæður farandverkamanna sem unnu að uppbyggingu í Katar hefur verið í sviðsljósinu sem og réttindi hinsegin fólks. Talið er að mörg þúsund farandverkamenn hafi látið lífið í Katar í undirbúningi landsins fyrir heimsmeistaramótið.

Á fundinum fór Infantino mikinn í nærri fjörtíu mínútna langri einræðu og sagði Evrópubúa hafa sýnt af sér hræsni í gagnrýni sinni gagnvart mótshöldurum.

„Við höfum fengið margar kennslustundir frá sumum Evrópubúum, frá hinum vestræna heimi. Ég held að Evrópubúar ættu að biðjast afsökunar næstu þrjú þúsund árin fyrir það sem við höfum verið að gera undanfarin þrjú þúsund ár, áður en við kennum öðrum siðferði.“

„Það eru ákveðnir hlutir í Katar sem eru ekki að virka og þá þarf að ræða. En þessar einhliða kennslustundir í siðferði eru ekkert nema hræsni.“

Í upphafi ræðunnar setti Infantino sig í spor ýmissa annarra og sagði að hann þekkti þá tilfinningu að vera mismunað sem erlendur aðili í erlendu landi.

„Í dag líður mér eins og Katara, eins og Araba, eins og Afríkumanni. Í dag finnst mér ég vera samkynhneigður. Í dag finnst mér eins og mér sé mismunað. Í dag líður mér eins og farandverkamanni.“

„Að sjálfsögðu er ég ekki Katari, ég er ekki Arabi eða Afríkumaður. Ég er ekki samkynhneiðgur, ekki fatlaður. En mér líður þannig því ég veit hvernig það er að vera mismunað, að vera lagður í einelti, að vera útlendingur í öðru landi.“

Infantino segir að hann hafi verið lagður í einelti í æsku því hann var Ítali með rautt hár og freknur.

„Hvað gerir maður þá? Þú reynir að taka þátt, eignast vini. Þú byrjar ekki að ásaka, slást, móðga heldur byrjar þú að taka þátt í samfélaginu. Þetta er það sem við ættum að gera.“