Tónlist

Baggalútur afhjúpar samstarf við frægan erlendan listamann

Dóra Júlía Agnarsdóttir skrifar
Listamaðurinn Krištof Kintera mun hanna sviðið á jólatónleikum Baggalúts.
Listamaðurinn Krištof Kintera mun hanna sviðið á jólatónleikum Baggalúts. Aðsend

Ástsæla og sívinsæla sveitin Baggalútur var að senda frá sér myndband af áhugaverðum blaðamannafundi þeirra. Ástæðan er komandi jólatónleikatörn sveitarinnar og samstarf við tékkneska listamanninn og hönnuðinn Krištof Kintera.. 

Hér má sjá upptöku Baggalúts af blaðamannafundinum:

Klippa: Baggalútur kynnir Kri tof Kintera

Umhverfisvæn listsköpun

Tékkneski myndlistarmaðurinn Krištof Kintera mun hanna og reisa sviðið á jólatónleikum Baggalúts í Háskólabíói. Verkið verður unnið í samstarfi við Terra umhverfisþjónustu, sem leggur listamanninum til hráefni. Krištof er þekktur fyrir að nota hluti sem hafa verið fleygt eða fargað í sinni listsköpun og þá gjarnan raftæki. 

„Verk hans kveikja gjarnan hugrenningar um ýkta neyslumenningu, sóun, ágang á auðlindir jarðar og stöðu mannfólks í umhverfi sem fer hratt hnignandi þrátt fyrir örar tækniframfarir,“ segir í fréttatilkynningu. 

Kintera endurvinnur gamla hluti og breytir þeim í listaverk.Aðsend

Óskað eftir nytjahlutum

Listamaðurinn kemur til Íslands ásamt föruneyti síðar í mánuðinum en undirbúningur hefur staðið yfir síðan í sumar. Hann hefur sérstaklega óskað eftir ákveðnum hlutum sem verður safnað í sérmerkta gáma við vesturenda Háskólabíós, á móts við Dunhaga, á laugardag og sunnudag næstkomandi. Óskað er eftir þvottavélum, borðlömpum, standlömpum, gervijólatrjám, jólaseríum og ryksugum. 

„Þau sem vilja nýta tækifærið og koma fyrrgreindum hlutum í endurnýtingu og sjá þá öðlast nýtt hlutverk á sviði Háskólabíós í desember, eru beðin um að koma þeim snyrtilega fyrir í gámunum. 

Og kannski mun gamla góða ryksugan þín eða þvottavélin hans afa verða miðpunktur listaverks á heimsmælikvarða,“

segir jafnframt í tilkynningunni. 

Gamlar og ónýttar þvottavélar nýtast Kintera vel.Aðsend

Grínjólatónleikabransinn ekki undanskilinn

Líf Lárusdóttir, markaðsstjóri Terra, segir þau fagna þessu tækifæri til að taka þátt í listsköpun þar sem hráefnið er nytjahlutir sem öðlast nýtt hlutverk. 

„Það er mikilvægt að nýta helst allt til fullnustu og skilja ekkert eftir. Það er mjög ánægjulegt að vera þátttakandi í þessu verkefni og við hlökkum mikið til að sjá útkomuna á sviði Háskólabíós.“

Guðmundur Kristinn Jónsson er leiðtogi tónlistar hjá Baggalúti og segir hljómsveitina í raun alltaf verið duglega við að endurvinna gamla slagara og gefa þeim framhaldslíf sem jólalög.  

„Þannig að ef þú pælir í því þá eru þessi fyrri tíma jólalög okkar meira og minna endurvinnsla. Sem er auðvitað frábært. 

En að því sögðu er afar mikilvægt að við hysjum öll upp um okkur og förum að hugsa um umhverfismál af alvöru. Grínjólatónlistarbransinn er þar ekki undanskilinn. 

Koma Krištofs Kintera er mikill fengur fyrir Baggalút að sjálfsögðu en ekki síður hvalreki fyrir íslenskt menningarlíf.“


Tengdar fréttir

Baggalútur gefur út nýtt lag og myndband

Er eg að verða vitlaus, eða hvað? er fyrsta lagið á væntanlegri plötu Baggalúts þar sem flutt eru ný lög við vísur og kvæði vestur–íslenska skáldsins Káins (1860–1936).

Jólalag dagsins: Baggalútur syngur Annar í jólum

Sautjándi desember er runninn upp og því tíu dagar til jóla. Á sjónvarps- og útvarpsvef Vísis má finna fjölmörg hugljúf jólalög sem margir af okkar fremstu listamönnum hafa tekið í gegnum tíðina.

Frumsýning á nýju myndbandi með Baggalúti

Baggalút þarf vart að kynna fyrir fólki en sveitin hefur verið starfandi um margra ára bil og er ein vinsælasta hljómsveit landsins, og ber þess sérstaklega merki í desembermánuði þar sem jólatónleikar þeirra telja á tugum og allir smekkuppseldir.






Fleiri fréttir

Sjá meira


×